Ինչ պատկեր է արձանագրվել «Աթենք», «Բիելլա» և «Բեկոն» ֆիրմաների արտադրանքի ստուգման ժամանակ

Ինչպես ավելի վաղ տեղեկացրել էինք, Orer.am-ը շարունակում է ուշադրության կենտրոնում պահել երշիկեղենի շուկան: Հերթական անգամ լաբորատոր ստուգման ենք ներկայացրել տարբեր ընկերությունների կողմից արտադրվող եփած երշիկի մի քանի տեսակ:

Լաբորատոր փորձաքննության են ենթարկվել «Աթենք» ընկերության «Բժշկական», «Բիելլա» ընկերության «Նախաճաշի» և «Բեկոն» ընկերության «Տնակ» ապրանքանիշի «Բժշկական» տեսակի եփած երշիկները, որպեսի պարզենք, թե դրանց մեջ որքա՞ն է կազմում նատրիումի նիտրիտի քանակությունը:

Տեղեկացնենք նաև, որ սննդային հավելումների մասին ԵԱՏՄ տեխնիկական կանոնակարգի համաձայն երշիկի 1 կիլոգրամի մեջ նատրիումի նիտրիտի քանակությունը, որը մակնշման ժամանակ նշվում է E 250, չպետք է գերազանցի 50 միլիգրամը:

ՍԱՏՄ ենթակայության տակ գործող Հանրապետական անանսնաբուժասանիտարական և բուսասանիտարական լաբորատոր ծառայությունների կենտրոնում իրականացված լաբորատոր ստուգման արդյունքում պարզվել է, որ «Աթենք» ընկերության «Բժշկական» տեսակի երշիկի մեջ նատրիումի նիտրիտի պարունակությունը 1 կիլոգրամի հաշվարկով կազմել է 37 միլիգրամ: «Բիելլա» ընկերության «Նախաճաշի» տեսակի 1 կիլոգրամի մեջ այն կազմել է 40 միլիգրամ, իսկ «Բեկոն» ընկերության «Տնակ» ապրանքանիշի «Բժշկական» տեսակի երշիկի մեջ նիտրիտի պարունակությունը եղել է 21 միլիգրամ:

Փորձաքննության արդյունքները ցույց են տալիս, որ ամենաշատ նատրիումի նիտրիտ պարունակում են «Աթենք» ընկերության «Բժշկական» և «Բիելլա» ընկերության «Նախաճաշի» տեսակի եփած երշիկները, որը համարվում է բավական բարձր ցուցանիշ, քանի որ մոտ է թույլատրելի շեմին և ռիսկային է առողջության համար:

ՀԱԲԼԿ ՊՈԱԿ-ի քիմիական հետազոտությունների բաժնի գլխավոր մասնագետ Նելլի Դանիելյանը Orer.am-ի հետ զրույցում նշեց, որ ներկայացված երշիկների 1 կգ-ի մեջ նատրիումի նիտրիտի պարունակության տարբերությունը արտադրող ընկերության կողմից է սահմանվում:

«Ինչ վերաբերում է ԵԱՏՄ կանոնակարգերին, ապա միայն թույլատրելի վերին շեմն է սահմանվում: Թույլատրելի ներքևի շեմ գոյություն չունի: Նատրիումի նիտրիտը թեև համարվում է սննդային հավելում, սակայն մակնշման ժամանակ չի նշվում դրա քանակությունը: Ուստի սովորական սպառողը չի կարող հասկանալ, թե իրականում ո՞ր տեսակի երշիկի մեջ ինչքա՞ն է այդ նյութի պարունակությունը»,- ասաց Ն. Դանիելյանը:

Մասնագետը խորհուրդ տվեց արտաքին տեսքից նատրիումի նիտրիտի քանակի մասին որոշակի պատկերացում կազմելու համար ուշադրություն դարձնել երշիկի գույնին: Որքան վառ է եփած երշիկի կարմիր երանգը, այնքան նատրիումի նիտրիտ կոչվող քիմիական նյութի պարունակությունը շատ է:

«Նատրիումի նիտրիտը համարվում է նաև գույնի ֆիքսատոր: Այդ է պատճառը, որ այն հիմնականում եփած երշիկների մեջ է օգտագործվում: Եփելու ընթացքում միսը կորցնում է իր վառ կարմիր գույնը: Ուստի այն ավելացնում են, որպեսզի երշիկը մսի գույնը պահպանի»,- ասաց Ն. Դանիելյանը:

Մասնագետը խորհուրդ տվեց նաև երշիկ գնելուց առաջ սկզբում ուշադրություն դարձնել մակնշմանը: Եթե նշված է E 250, դրանից հետո, հարկավոր է երշիկի գույնին նայել:

Նշենք նաև, որ նատրիումի նիտրիտը օրգանիզմում կուտակվելու հատկություն չունի, քանի որ լավ լուծվում է ջրային միջավայրում, իսկ թթվային միջավայրի պայմաններում վերածվում է նիտրոզոամինի, որը օրգանիզմում կուտակվելու հատկություն ունի և համարվում է քաղցկեղածին նյութ:

«Մարդու օրգանիզմը ջրային միջավայր է, ուստի նատրիումի նիտրիտն անմիջապես լուծվում է և ներծծվում օրգանիզմում: Բայց եթե նատրիումի նիտրիտը հասցնի քիմիական ռեակցիայի մեջ մտնել թթուների հետ, ապա կվերածվի նիտրոզոամինների, այսինքն՝ կփոխի իր կազմը: Օրգանիզմը նիտրոզոամիններից մաքրելու կամ դրա ազդեցությունը չեզոքացնելու համար հարկավոր է հիմնային աղեր պարունակող հեղուկներ կամ սնունդ օգտագործել: Օրինակ՝ սոդայաջուրը»,- ասաց Ն. Դանիելյանը:

Մենք շարունակում ենք ուսումնասիրել երշիկի շուկան և ժամանակ առ ժամանակ կներկայացնենք մյուս ապրանքատեսակների փորձաքննության արդյունքները: Լաբորատոր փորձաքննության ենթարկելուց բացի, առաջիկայում կներկայացնենք նաև երշիկեղենի արտադրության մեջ օգտագործվող հավելանյութերի, ինչպես նաև փորձաքննության ենթարկված նմուշների արդյունքների մասին ոլորտի այլ փորձագետների կարծիքը:

 

Արմինե Գրիգորյան

դիտվել է 31 անգամ
Լրահոս
Գ.Ծառուկյանն ընդունել է Արաբական երկրների ըմբշամարտի ֆեդերացիայի նախագահին. ստորագրվել է հուշագիր «Իրավական ուղի» ՀԿ համահիմնադիրը Ժնևում խոսել է Հայաստանում տիրող իրավական խնդիրների մասինԿուզեի տղամարդու «ժամանակակից տեսակ»-ը մրցակցության մեջ չլիներ կնոջ հետ. Լիլի Հովեր Թուղթը աղբ չէ, պլաստիկը՝ նույնպես Չեչնիայի նախագահ Ռամզան Կադիրովի շնորհավորական ուղերձը Արթուր Վանեցյանի ծննդյան առթիվ «Հանրային շահ» հասարակական կազմակերպության հայտարարությունը Հայաստանում «սխոդկա» նախատեսված չէ. լուրերը կեղծ են Աբրահամ Դանագյոզյանը մանրամասներ է ներկայացրել ԱՄԷ-ից ժամանած պատվիրակության եւ այցի նպատակի մասին Պատերազմող երկրում ծառայությունը պարտադիր է, սակայն 18 տարեկաններին առաջնագծում պետք է փոխարինեն պրոֆեսիոնալները. Արման Վարդանյան Կայացել է Քեն Քիզիի «Թռիչք կկվի բնի վրայով» վեպի համանուն ներկայացումը Գարի Քյոսայանի հեղինակային երաժշտությամբ
Ամենաընթերցված