Հայաստանին այժմ իրական միասնականություն է հարկավոր. Գագիկ Ծառուկյանը պետք է ազատության մեջ լինի
Ինեսսա Խաչատրյանը ֆեյսբուքյան իր էջում գրում է
Ինչ խոսք, Հայաստանի համար ճակատագրական օրեր են: Առանց այլևայլությունների կարելի է ասել, որ այսօր 2000-2001 թթ. սերունդը ռազմաճակատում Հայաստանի համար գոյության խնդիր է լուծում, հայ ազգի համար լինելության իրավունք է վաստակում:
Այս պայմաններում երկրի ներսում ասել, որ օդ ու ջրի պես համերաշխություն է հարկավոր, կնշանակի ոչինչ չասել: Առաջնագծում կռվող տղաների թիկունքը հիմա մենք ենք, մեր միասնությունն է: Եվ սա չպետք է լինի կեղծ միասնություն, կեղծ մեսիաներ մեզ հիմա հարկավոր չեն: Միասնության կոչը պետք է լինի անկեղծ, պետք է լինի առարկայական, մարդիկ պետք է հավատան այդ միասնությանը:
Իսկ որքանո՞վ են անկեղծ իշխանության կողմից հնչող միասնության կոչերը, մարդիկ հավատում են դրան, թե՞ ոչ: Եթե մի պարզ հայացք գցենք ներքաղաքական դաշտի վրա, կհասկանանք, որ իշխանությունների միասնականության կոչը ազնիվ չէ: Հայրենիքի համար օրհասական այս օրերին, երբ մի կողմ պետք է դրվեին քաղաքական ցանկացած տարաձայնություն, ցանկացած կուսակցական շահ, մենք տեսնում ենք հակառակը:
Մասնավորապես իշխանությունները քաղաքական պատվերի շրջանակներում շարունակում են կալանքի տակ պահել ԲՀԿ նախագահ Գագիկ Ծառուկյանին: Այն, որ պատվերը քաղաքական է, ոչ ոք կասկած չունի, ինչպես նաև ոչ ոք կասկած չունի, որ Գագիկ Ծառուկյանը Հայաստանում և դրա սահմաններից դուրս հեղինակություն վայելող անձ է:
Երկար տարիներ Գագիկ Ծառուկյանի անմիջական աջակցությամբ Հայաստանում օտարերկրյա ներդրումներ են ապահովվել, դիվանագիտական ամբողջ պատվիրակությունների այց է կազմակերպվել դեպի Արցախ, որպեսզի մարդիկ հասկանան, որ Արցախ աշխարհը կայացած պետություն է:
Եվ կրկնում եմ օրհասական այս օրերին Գագիկ Ծառուկյանին կալանքի տակ պահելը ոչ մի ռացիոնալ դատողության չի ենթարկվում, այն էլ այն դեպքում, որ կալանքի իրավական հիմքերն էլ ծիծաղելի են: Այն օգուտը, որը նա տասնամյակներ շարունակ տվել է և վստահաբար կարող է տալ Հայաստանին, չօգտագործելը առնվազն սխալ հաշվարկ է, որից տուժում է միայն Մայր Հայրենիքը: