ԶՊՄԿ-ն նոր պոչատար խողովակաշար է կառուցելու

Հայաստանի թիվ մեկ հարկատուն՝ «Զանգեզուրի պնղձամոլիբդենային կոմբինատը» նոր պոչատար խողովակաշար է կառուցելու, որը կօգնի ավելի արդյունավետ իրականացնել վտանգավոր թափոնների մշակումը։ Հաջորդ շաբաթ Քաջարանում երկու հանրային լսում է կայանալու, որոնք վերաբերում են ԶՊՄԿ-ի արդիականացմանն ուղղված փոփոխություներին։

Կոմբինատը նաև ներկայացնելու է շրջակա միջավայրի վրա ազդեցության գնահատման հաշվետվությունների ներկայացում։ Բնապահպանական նորմերի պահպանումն ընկերության համար առաջնային է, և ԶՊՄԿ-ն հատկապես վերջին տարիներին ահռելի աշխատանք է կատարել այդ ուղղությամբ։

Ընկերության կայուն զարգացման գծով տնօրեն Արմեն Ստեփանյանի խոսքով, ներկայումս գործող պոչատար խողովակաշարերի մաշվածության պատճառով վթարների առաջացման ռիսկը բավական մեծ է, և դրանք հնարավոր վթարների կանխարգելման և դրանց հետ կապված ռիսկերի ավելի արդյունավետ կառավարման նպատակով որոշվել է կառուցել նոր պոչատար խողովակաշար, այլ ոչ թե իրականացնել հին խողովակաշարերի մասշտաբային վերանորոգման աշխատանքներ։

Ըստ ԶՊՄԿ-ի ներկայացուցչի, բնապահպանական ժամանակակից տեխնոլոգիաներում ավելի զգալի ներդրում է նախագծով նախատեսվող մեկ այլ ծրագիր՝ մասնակի շրջանառու ջրամատակարարման համակարգը, որը նույնպես ներկայացվելու է հանրային լսմանը։ «Համակարգը թույլ կտա կրճատել թարմ տեխնիկական ջրի ծախսը, ապահովելով նաև պոչամբար մղվող պոչանքի ծավալի կրճատումը։ Փորձեմ առավել մատչելի բացատրել։ Պոչանքի ընդհանուր ծավալի 50 %-ի խտացման արդյունքում զանգվածից առանձնացված ջուրը կօգտագործվի տեխնոլոգիական պրոցեսներում՝ նվազեցնելով թարմ տեխնիկական ջրի օգտագործումը 20-30 %-ով։ Ընդ որում, կարևոր եմ համարում նշել, որ սա ամենաժամանակակից տեխնոլոգիայով կառուցվելիք համակարգ է, որը տեղադրվելու է ամբողջովին փակ շենքում՝ կահավորված աղմուկից և այլ կողմնակի ազդեցություններից առավելագույն պաշտպանության համակարգերով»,– լրատվամիջոցներից մեկի հետ զրույցում ասել է ԶՊՄԿ կայուն զարգացման գծով տնօրենը, հավելել, թե այդ ծրագիրը մոտ 35 մլն ԱՄՆ դոլար կապիտալ ծախս է ենթադրում։

Անի Մելիքյան