Գազայում մեկ օրում 112 մարդ է զոհվել իսրայելական հարձակումների հետևանքով

Գազայի հատվածում իսրայելական հարձակման հետևանքով մեկ օրվա ընթացքում առնվազն 112 պաղեստինցի է զոհվել։ Զոհերից 33-ը, որոնց մեծամասնությունը կանայք և երեխաներ են, գրանցվել են Գազայի երեք դպրոցների վրա իսրայելական ուժերի հարձակման պատճառով։ «Արմենպրես»-ի փոխանցմամբ՝ այս մասին հաղորդում է «Al Jazeera»-ն։ 

Դպրոցներն օգտագործվում էին որպես ապաստարան հարյուրավոր տեղահանված պաղեստինցի ընտանիքների համար։ 

Գազայի առողջապահական իշխանությունների հաղորդմամբ՝ 18 մարդ զոհվել է ապրիլի 4-ի լուսադեմից ի վեր Գազայի հատվածում իսրայելական հարձակումների ժամանակ։

Հազարավոր պաղեստինցիներ ապրիլի 3-ին ստիպված լքել են իրենց բնակավայրերը Գազա քաղաքից արևելք գտնվող աշ-Շուջաիա և ազ-Զեյթուն թաղամասերից՝ տարհանման մասին Իսրայելի նախազգուշացումներից անմիջապես հետո՝ անվտանգ ապաստան գտնելու հույսով։ 

Իսրայելի բանակի ներկայացուցիչը հայտնել է, որ բանակն աշխատում է Գազայի հատվածի հյուսիսում ցամաքային գործողության ընդլայնման ուղղությամբ։

ՄԱԿ-ի հումանիտար հարցերի համակարգման գրասենյակը հրապարակել է քարտեզ, որը ցույց է տալիս, որ Գազայի տարածքի 65 տոկոսն այժմ կա՛մ իսրայելական ռազմական գոտիներ են, կա՛մ ենթակա են հարկադիր տեղահանման հրամանների:

Չնայած ՀԱՄԱՍ-ի հետ գործող հրադադարին, մարտի 18-ից Իսրայելը վերսկսել է ռազմական գործողությունները։ Այս ընթացքում զոհվել է առնվազն 1163 պաղեստինցի, վիրավորվել՝ 2,735-ը:

Գազայի առողջապահության նախարարությունը հայտնել է, որ 2023 թ. հոկտեմբերի 7-ից ի վեր առնվազն 50,523 պաղեստինցի է զոհվել Գազայի դեմ Իսրայելի պատերազմի հետևանքով, վիրավորվել է շուրջ 114,776 մարդ:

Իսրայելը Գազայի հատվածում ռազմական գործողություններ էր սկսել՝ ի պատասխան պաղեստինյան ՀԱՄԱՍ շարժման զինյալների ներխուժման, որի հետևանքով զոհվել էր 1200 մարդ, գերեվարվել՝ շուրջ 250 մարդ։