Անահիտ աստվածուհու արձանի մասերի ցուցադրության եկամուտը կազմել է շուրջ 122 մլն դրամ, իսկ ծախսված ընդհանուր գումարը՝ շուրջ 159 մլն դրամ

«Մայր աստվածություն, Անահիտից Մարիամ» ժամանակավոր ցուցադրության արդյունքում «Հայաստանի պատմության թանգարան» ՊՈԱԿ-ի եկամուտը կազմել է 121 մլն 898 հազար (121,898,000) դրամ: Այս մասին Tert.am-ի գրավոր հարցմանն ի պատասխան տեղեկացրել են ԿԳՄՍ նախարարությունից:

Tert.am-ը մասնավորապես հետաքրքրվել էր՝ որքան է կազմել ցուցադրությունը կազմակերպելու ծախսը և որքան՝ շահույթը:

««Մայր աստվածություն, Անահիտից Մարիամ» ժամանակավոր ցուցադրության կազմակերպման նպատակով հատկացվել է Հայաստանի Հանրապետության պետական բյուջեից՝ 68 մլն 877 հազար 600 (68,877,600) դրամ, «Հայաստանի պատմության թանգարան» ՊՈԱԿ-ի արտաբյուջետային միջոցներից՝ 50 մլն 872 հազար 735 հազար (50,872,735) դրամ:

«Հայաստանի պատմության թանգարան» ՊՈԱԿ-ի եկամուտը ցուցադրությունից կազմել է 121 մլն 898 հազար (121,898,000) դրամ:

Միաժամանակ հայտնում ենք, որ ցուցադրության կազմակերպմանն աջակցել է նաև «Կերոն» զարգացման հիմնադրամը՝ տրամադրելով 39 մլն 210 հազար (39,210,000) դրամ»,- ասված է ԿԳՄՍ նախարարության պատասխանում:

Հիշեցնենք, որ Անահիտ աստվածուհու բրոնզաձույլ գլուխն ու ձեռքը, որ պահվում են Բրիտանական թանգարանում, սեպտեմբերի 21-ից ցուցադրվում էին Հայաստանի պատմության թանգարանում, դրանք ցուցադրվեցին վեց ամիս Մայր աստվածությանը վերաբերող նմուշների հետ: Այնուհետև ցուցադրությունը երկարաձգվեց մինչև ապրիլի 10-ը, Անահիտ աստվածուհու բրոնզաձույլ գլուխն ու ձեռքն արդեն վերադարձվել են Բրիտանական թանգարան:

Նշենք, որ Անահիտի բրոնզաձույլ արձանը նախկինում երբեք Հայաստանում չէր ցուցադրվել։ Ըստ Բրիտանական թանգարանի կայքի՝ Անահիտի պաշտամունքային արձանի այս գլուխը գտնվել է 1870-ականներին՝ Էրզրումի Սաթալա բնակավայրում։ Մի քանի հնավաճառներ այն ձեռքից ձեռք են փոխանցել, ի վերջո, Անահիտի կիսանդրին Բրիտանական թանգարանն է ձեռք բերել։