Որքա՞ն գեղամնազարյաններ կան ընդդիմության շարքերում

Հայ հանրությունը զայրացած է։ ԱԺ «Հայաստան» խմբակցության նախկին, ներկայումս անկախ պատգամավոր Գեղամ Նազարյանը չի բացառել, որ ընդհուպ կարող է միանալ «Քաղաքացիական պայմանագրին»՝ հրաժարվելով մասնակցել Փաշինյանի իմպիչմենտի նախաձեռնությանը։ Հիշեցնենք, օրեր առաջ հասարակական գործիչներ Էդգար Ղազարյանն ու Նարեկ Մալյանը դիմել էին ԱԺ պատգամավորներին Փաշինյանին իմպիչմենտի գործընթաց սկսելու կապակցությամբ։

Ընդդիմությունն առայժմ զերծ է մնում հստակ կարծիք հայտնելուց, հասկանալով, որ այս պահին չունեն բավարար ռեսուրսներ Փաշինյանին իշխանազրկելու։

Գեղամ Նազարյանը, որ 44-օրյա պատերազմում զոհված զինվորի հայր է, բավականին կոշտ շեշտադրումներով էր խոսում Նիկոլ Փաշինյանի հասցեին, ընդհուպ ամբիոնից անձնական վիրավորանքներ հասցնելով նրան և իր կնոջը։ Ժամանակին աշխատելով Փաշինյանի թերթում, Գեղամ Նազարյանը հրաշալի գիտի, թե ով է Նիկոլ Փաշինյանը, ինչի է ընդունակ, և այդ մասին պարբերաբար հայտնում էր իր ելույթներում։ Ընդդիմությունն էլ ինչ-ինչ հանգամանքներ հաշվի առնելով, Գեղամ Նազարյանին տարավ խորհրդարան։

Կարճ ժամանակ անց բացահայտվեց, որ Նազարյանն ամենևին էլ մտադիր չէ պայքարել փաշինյանական իշխանության դեմ, դուրս եկավ «Հայաստան» դաշինքից, և այսօր գրեթե շարժվում է «Քաղպայմանագրի» ուղեծրով։ «ՔՊ-ին կարող եմ միանալ հանուն պետության, իսկ Փաշինյանի իմպիչմենտին չեմ մասնակցելու»,- ասել է Գեղամ Նազարյանը։ Վերջինս դարձել է նաև իշխանական լրատվամիջոցների, Հայաստանի Հանրային հեռուստաընկերության սպասելի հյուրը, որին հրավիրում և խոսեցնում են ընդդիմության դեմ։ Ի դեպ, հայտնի չէ, թե որքան գեղամնազարյաններ կան այսօրվա ընդդիմադիր խորհրդարանական խմբակցություններում, ուրիշ ովքեր են գործարքի գնացել ՔՊ-ի հետ՝ հանուն մի կտոր հացի։

Լիլիթ Մարտիրոսյան