Բա աշակերտներին ոչինչ չի՞ լինելու. ի՞նչ է կատարվել Մերձավանի դպրոցում, ի՞նչ է անելու ԿԳՄՍՆ-ն
Երկրորդ օրն է՝ հանրային տիրույթում քննարկման թիվ մեկ թեման Մերձավանի միջնակարգ դպրոցում տիրող խայտառակ բարքերն ու միջավայրն է: Հիշեցնենք, Մերձավանի դպրոցում ծնողները և աշակերտները երեկ դասադուլ էին հայտարարել, դժգոհել պատմության ուսուցչուհի Ռոզա Դավթյանից, ցուցաբերել, մեղմ ասած, անհարգալից վերաբերմունք ուսուցչական անձնակազմի նկատմամբ, որն անընդունելի է և անցնում է բոլոր նորմերը։
Այսօր ԿԳՄՍ նախարարությունն անդրադարձավ այս դեպքին՝ հայտարարելով, որ խստորեն դատապարտում է Արմավիրի մարզի Փարաքար համայնքի Մերձավան գյուղի միջնակարգ դպրոցում տեղի ունեցած միջադեպը, որի ընթացքում պատմության ուսուցչի նկատմամբ դրսևորվել է անթույլատրելի վերաբերմունք՝ դպրոցի տնօրենի ժամանակավոր պաշտոնակատարի, որոշ ուսուցիչների, աշակերտների և ծնողների մասնակցությամբ։
«Միաժամանակ տեղեկացնում ենք, որ Արմավիրի մարզպետի աշխատակազմի հետ համագործակցությամբ որոշում է կայացվել սահմանված կարգով տնօրենի ժամանակավոր պաշտոնակատարին աշխատանքից ազատելու և տնօրենի նոր ժամանակավոր պաշտոնակատար նշանակելու վերաբերյալ»,- ասված է հայտարարության մեջ։
Տնօրենի պահով հասկանալի է, սակայն օրակարգում ոչ պակաս կարևոր հարց կա՝ ի՞նչ է լինելու այդ խայտառակ տեսանյութով հայտնի դարձած աշակերտների հետ, որոնց պահվածքը ուղղակի զազրելի է. նրանց խոսելաձևը, վարքը, գնահատականներն ու պահելաձևը ուղղակի նվաստացնում են կրթօջախի դերն ու նշանակությունը, և չենք վախենում ասել՝ ի ցույց դնում իրենց ընտանիքներում տիրող բարքերը, որոնք, փաստացի, դպրոցը չի կարողանում ոչ միայն արմատախիլ անել, այլև քողարկել: Արդյո՞ք բացատրական աշխատանքներ կտարվեն աշակերտների և ծնողների հետ, արդյո՞ք ԿԳՄՍՆ-ն ավելի խիստ մեթոդների կգնա՝ դպրոցից հեռացում և այլն, թե՞ աչք կփակի այս միջադեպի վրա, սահմանափակվելով տնօրենի ազատմամբ: Այս հարցերը MediaHub-ն ուղղեց ԿԳՄՍ նախարարի խոսնակին:
«Մերձավանի միջնակարգ դպրոցում ուսուցչի նկատմամբ աշակերտների անթույլատրելի վերաբերմունքը խիստ դատապարտելի է, սակայն հանրակրթությունը պարտադիր է, ուստի վարքային խնդիրները չեն կարող դառնալ կրթության իրավունքի խախտման պատճառ»,- եղավ պատասխանը։
Նելլի Վահանյանը MediaHub-ին նաև ասաց, որ դպրոցում աշխատելու է համապատասխան մասնագետների խումբ, և խմբի ուսումնասիրության արդյունքում բոլոր անհրաժեշտ քայլերը կձեռնարկվեն:
«Ինչպես արդեն նշվել է, Մերձավանի միջնակարգ դպրոցը կգտնվի հատուկ մշտադիտարկման ներքո՝ խորքային խնդիրների ուսումնասիրության և արդյունավետ լուծումների մշակման համար։ Արձանագրված միջադեպը վկայում է դպրոցում առկա համակարգային և բազմաշերտ խնդիրների մասին, որոնք պահանջում են ուշադրություն և գործնական քայլեր»,– հավելեց Վահանյանը։
Մարիաննա Արամյան
Յունիբանկը մեկնարկել է նոր ակցիա «U-Teenager». գլխավոր մրցանակը՝ ամառային դասընթաց արտերկրի լավագույ...
Մեր զորակցությունն ու աջակցությունն ենք հայտնում Գագիկ Ծառուկյանին և նրա ընտանիքին․ Խաչիկ Ասրյան
Արցախի թեման մնացել է խոսքերի մակարդակում․ ինստիտուտներ չկան, պատասխանատուներ՝ նույնպես. Էդմոն Մարու...
Ոչ միայն քաղաքական է, այլև աշխարհաքաղաքական. «Փաստ»
Արցախցիների պահանջը՝ իրենց տներ վերադառնալու, ոչ մի կերպ առիթ չի կարող դառնալ պատերազմ հրահրելու. Ան...
ԶՊՄԿ-ում աշխատելը՝ կայունության, զարգացման և նոր հնարավորությունների մասին
50% աղքատություն՝ արցախցիների շրջանում․ «բարեկեցություն» բառով իրականությունը չեք փոխի․ Արեգա Հովսեփ...
Ծանր վիճակ՝ վտանգավոր միտումներով. «Փաստ»
Եկող տարի մենք ունենալու ենք գյուղմթերքի դեֆիցիտ. Հրայր Կամենդատյան
Հայաստանում կան շատ պայծառ մարդիկ, որոնց հետ միասին պետք է վեր հանենք մեր երկիրը. Աննա Կոստանյան