Ռուսաստանը կոշտ է արձագանքելու ֆաշիզմի արդարացման փորձերին

Օրերս Հանրային հեռուստաընկերությունում տեղի ունեցած խայտառակ հարցազրույցը, երբ Պետրոս Ղազարյանը հյուր էր հրավիրել փաշինյանական վարչախմբի գլխավոր քարոզիչներից մեկին՝ Արծրուն Հովհաննիսյանին, լրջորեն մտահոգել է ռուսաստանյան քաղաքական և իրավապահ մարմիններին։ Հովհաննիսյանը փաստացի իր հարցազրույցով ափսոսանք էր հայտնում, որ Մեծ հայրենականում հաղթել է ոչ թե հիտլերյան Գերմանիան, այլ Խորհրդային Միությունը։

Մեր տեղեկություններով, Ռուսաստանում ընդհուպ քննարկում են քրեական գործ հարուցելու թեման. ֆաշիզմի արդարացման ցանկացած դեպք, նույնիսկ ոչ Ռուսաստանի տարածքում, ընկալվում է որպես տեռորիզմի խրախուսում, ֆաշիզմի արդարացում, և ռուսական իրավապահ համակարգը համարում է, որ դա որոշակի վտանգ է ներկայացնում հենց Ռուսաստանի համար, ուստի և չի բացառվում, որ բավականին կոշտ արձագանք լինի ռուսական կողմից, առավել ևս ռուսական իշխանությունները հարցազրույցն ընկալել են որպես ԵԱՏՄ դաշնակցի կողմից իրենց դեմ ուղղված քայլ։ Հատկապես, որ այդ հարցազրույցը հեռարձակվել է ոչ թե սովորական ինչ-որ լրատվամիջոցով, այլ պետական թիվ մեկ հեռուստատեսությամբ, և դա, բնականաբար, պետական քաղաքականության դրսևորում էր։

Ամենայն հավանականությամբ, առաջիկայում Ռուսաստանում Հայաստանի դեսպան Գուրգեն Արսենյանին կհրավիրեն ԱԳՆ՝ բողոքի նոտա հանձնելու նպատակով, չի բացառվում նաև, որ Ռուսաստանը, Արծրուն Հովհաննիսյանին, Պետրոս Ղազարյանին կամ էլ որոշ այլ անձանց ընդհանրապես հայտարարի պերսոնա նոն-գրատա՝ դրանից բխող բոլոր հետևանքներով։

Սաթինե Սարգսյան