«Սա նման էր չնախատեսված հանդիպման»․ Euronews-ը՝ Տիրանայում Փաշինյանի և Ալիևի շփման մասին

Հայաստանի և Ադրբեջանի ղեկավարները ուրբաթ օրը Տիրանայում կարճ քննարկում են ունեցել Եվրոպական քաղաքական համայնքի (ԵՔՀ) գագաթնաժողովի ժամանակ, գրում է Euronews-ը։

Այնուհետև Հայաստանի կառավարությունը հայտարարություն է հրապարակել, որում ասվում է, որ «երկու կողմերն էլ ընդգծել են երկու երկրների միջև խաղաղության համաձայնագրի ստորագրման ուղղությամբ հետագա առաջընթացի անհրաժեշտությունը»։

«Կողմերը փոխադարձաբար ընդգծել են հայ-ադրբեջանական խաղաղության համաձայնագրի տեքստը վերջնական տեսքի բերելու կարևորությունը։ Նրանք քննարկել են ընթացիկ իրավիճակը և ընդգծել ստորագրման ուղղությամբ հետագա առաջխաղացման անհրաժեշտությունը», - ասվում է Հայաստանի կառավարության մամուլի հաղորդագրության մեջ։ ԵՔՀ գագաթնաժողովից տեսանյութում երևում է, թե ինչպես է Հայաստանի վարչապետ Նիկոլ Փաշինյանը դիմում Ադրբեջանի նախագահ Իլհամ Ալիևին ԵՔՀ գագաթնաժողովի միջանցքներում, ինչը, կարծես, չնախատեսված հանդիպում էր։

Տեսանյութում Փաշինյանն ասում է. «Գնանք սուրճ խմենք», ինչին Ալիևը պատասխանում է. «Բանակցություններից հետո կգամ»։

Մեկ այլ տեսանյութում երևում է, թե ինչպես են երկու երկրների ղեկավարները զրուցում՝ նստած երկու երկրների պաշտոնյաների շրջապատում։ Այս հանդիպումը վկայում է շարունակվող դինամիկայի մասին այն բանից հետո, երբ մարտին Հարավային Կովկասի երկու հարևան մրցակից երկրները հայտարարեցին, որ ավարտել են Ղարաբաղի տարածաշրջանում տասնամյակների պատերազմը դադարեցնելուն ուղղված պատմական խաղաղության համաձայնագրի տեքստի վրա աշխատանքը։ Համաձայնագրի կնքման և երկու երկրների կողմից դրա ստորագրման ժամկետները դեռ պետք է որոշվեն», - գրում է Euronews-ը։