Իսրայելի գիշերային հարվածները Գազայում 40 մարդու կյանք են խլել

Իսրայելական բանակը մի շարք հարվածներ է հասցրել Գազայի հատվածին, ինչի հետևանքով զոհվել է առնվազն 40 մարդ։ Նրանցից 25-ը սպանվել են Դարաջի թաղամասի դպրոցի շենքի վրա հարձակման հետևանքով. դպրոցը ծառայում էր որպես ապաստարան, հաղորդում է AP-ն՝ վկայակոչելով տեղի պաշտոնյաներին:

Հարձակումը տեղի է ունեցել այն ժամանակ, երբ մարդիկ քնած են եղել։ Իսրայելը պնդում է, որ դպրոցում տեղակայված է պաղեստինյան ՀԱՄԱՍ խմբավորման հրամանատարական կենտրոնը: Հարձակման հետևանքով վիրավորվել է նաև ավելի քան 55 մարդ։ Մահացածների թվում են հայրը և նրա հինգ երեխաները։ Հրդեհվել է նաև ներսում գտնվող խաղաղ բնակիչների գույքը։

Գազա քաղաքի տեղական ալ-Շիֆա հիվանդանոցի տվյալներով՝ առանձին հարձակում է տեղի ունեցել նաև բնակելի շենքի վրա: Այնտեղ մահացել է մեկ ընտանիքի 15 անդամ, այդ թվում՝ հինգ կին և երկու երեխա։

Մայիսին Իսրայելը Գազայի հատվածում նոր ցամաքային գործողություն է սկսել՝ «Գեդեոնի կառքը» անվանումով: Դրա նպատակն է պաղեստինյան անկլավի վրա բանակի ավելի խիստ օպերատիվ վերահսկողություն սահմանելն ու ՀԱՄԱՍ-ի հրամանատարական համակարգը ոչնչացնելը։