Եվրամիությունը չի կարող ապահովել ՀՀ անվտանգությունը

Եվրամիության դիվանագիտության ղեկավար Կայա Կալասի երեկվա այցը Հայաստան, Արարատ Միրզոյանի հետ հայտարարությունները հերթական անգամ նպատակ ունեին շեղելու հայ հանրությանը, նաև տպավորություն ստեղծելու, թե իբր Եվրամիությունը խորապես մտահոգված է Հայաստանի անվտանգության և պաշտպանության հարցերով։ Մամուլի ասուլիսում արտգործնախարար Արարատ Միրզոյանը հայտարարել է, թե համատեղ տրվել է Հայաստան-Եվրամիություն անվտանգության և պաշտպանության ոլորտներում խորհրդակցությունների մեկնարկը, համապատասխան հուշագիր է ստորագրվել։ Ըստ Միրզոյանի՝ «դա վճռորոշ քայլ է համագործակցության շրջանակը համապատասխանեցնելու ժամանակակից մարտահրավերներին ու գործադրելու դրանց հաղթահարման լրացուցիչ ջանքերը»։

«Սա է հավակնոտ փաստաթուղթը, որն առավել խորացնելու է ՀՀ-ԵՄ երկկողմ օրակարգը, միաժամանակ, խթանելով Հայաստանի և Եվրամիության միջև համապարփակ և ընդլայնված գործընկերության համաձայնագրի արդյունավետ կիրարկումը»,- նշել է Միրզոյանը։

Մինչդեռ փորձագետները նշում են, որ այս համագործակցությունը կրում է ընդամենը դեկլարատիվ բնույթ և որևէ կերպ ի վիճակի չէ ապահովելու Հայաստանի անվտանգությունը։ Առավել ևս, այս պայմաններում, երբ Հայաստանը փորձում է հեռանալ Հավաքական անվտանգության պայմանագրի կազմակերպությունից և ամբողջությամբ տրվել Եվրամիությանը, Եվրամիության հետ հարաբերությունները Հայաստանը փորձում է օգտագործել որպես Ադրբեջանի վրա ազդելու լծակ, բայց դա այս պահի դրությամբ, մեղմ ասած, անհեթեթ և վտանգավոր զարգացում է, ուստի այն, ինչ փորձում է անել Հայաստանի իշխանությունն այս ուղղությամբ, նոր վտանգներ մեր երկրի գլխին բերելն է, որևէ այլ տարբերակ քննարկելու չկա։

Կարինե Վանոյան