Իշխանությունը վերացնում է դիմադրության օջախները

Մինչ Փաշինյանն Աբու Դաբիում հանդիպում է Ադրբեջանի նախագահ Իլհամ Ալիևին, Ազգային անվտանգության ծառայությունն ու Քննչական կոմիտեն վաղ առավոտից խուզարկություններ են սկսել ընդդիմադիր գործիչների տներում։ Սպասելի էր, որ Ադրբեջանի հետ հարցերի կարգավորումից առաջ իշխանությունը պետք է վերացնի դիմադրության բոլոր օջախները։ Եվ թերևս դրանով է պայմանավորված դաշնակցական գործիչների դեմ իրականացվող բռնաճնշումները։

Դիմակավորված ԱԱԾ-ականներն այսօր տակնուվրա են արել պատգամավոր Գեղամ Մանուկյանի տունը, ձերբակալել նրա որդուն։ Ձերբակալվել և ոստիկանություն են տեղափոխվել Դաշնակցության այլ ներկայացուցիչներ ևս։ Թե ինչ քրեական գործի շրջանակներում են խուզարկությունները, Քննչական կոմիտեն դեռևս չի հայտնել։

Այդուհանդերձ, իրավապահները ինչ-որ գործ, բնականաբար, կկարեն կամ կկպցնեն «ահաբեկչության» գործին, այդ կերպ փորձելով կանխել հնարավոր բողոքը։

Իսկ մինչ այդ Աբու Դաբիում հանդիպել են Փաշինյանն ու Ալիևը։ Էմիրաթներում հանդիպման մասին հայտնի է դարձել մեկ շաբաթ առաջ Լոնդոնում գործող Middle East Eye կայքի հրապարակումից հետո: Նույն օրերին «Կարնեգի» վերլուծական կենտրոնը հրապարակել է նաև ճանապարհների ապաշրջափակման վերաբերյալ ամերիկյան առաջարկը, այն է՝ Ադրբեջանը Հայաստանի տարածքով Նախիջևանի հետ կապող ճանապարհի կառավարումը պատվիրակել ամերիկյան մասնավոր ընկերությանը։ Նախօրեին էլ պետքարտուղար Մարկո Ռուբիոն, թվելով վերջին կես տարում ամերիկյան դիվանագիտության հաջողությունները, հույս էր հայտնել, որ շուտով գրանցված արդյունքներին կարող է գումարվել նաև Ադրբեջանի և Հայաստանի միջև խաղաղության համաձայնագիրը։ Փաստացի, Արևմուտքն այս կերպ դուրս է մղում Ռուսաստանին կարգավորման գործընթացից, իսկ Հայաստանում էլ Փաշինյանը փորձում է բռնաճնշումներով կանխել ընդդիմադիր հնարավոր գործողությունները՝ Ադրբեջանի հետ խայտառակ պայմաններով նոր կապիտուլյացիա ստորագրելու համար։

Մերի Անտոնյան