Պատրաստ ենք պատերազմին. Սիրիայի նախագահն արձագանքել է Դամասկոսի վրա Իսրայելի հարվածներին

Սիրիական իշխանությունները թույլ չեն տա, որ դրուզ փոքրամասնությունը ներքաշվի արտաքին ուժի գործերի մեջ, և սիրիացի ժողովուրդը չի վախենում պատերազմից: Այս մասին հայտարարել է Սիրիայի ժամանակավոր նախագահ Ահմեդ ալ-Շարաան, հաղորդում է Reuters-ը:

Նա դրուզ քաղաքացիների և նրանց իրավունքների պաշտպանությունը համարել է Սիրիայի առաջնահերթություն:

Չորեքշաբթի Դամասկոսի վրա Իսրայելի կողմից հզոր ավիահարվածներից հետո իր առաջին հեռուստատեսային ելույթում ալ-Շարաան դիմել է դրուզ փոքրամասնությանը:

«Մենք չենք վախենում պատերազմից, բայց մենք սիրիացի ժողովրդի շահերը դասել ենք ոչնչացումից վեր: Ձեր (դրուզների) իրավունքների պաշտպանությունը մեր առաջնահերթությունն է, և մենք մերժում ենք ձեզ արտաքին ուժի ձեռքը ներքաշելու ցանկացած փորձ», - ասել է նա:

Սիրիայի առաջնորդը նաև հավելել է, որ Սիրիան «նրանցից չէ, որոնք վախենում են պատերազմից»:

«Սիրիացի ժողովուրդը չի վախենում պատերազմից և պատրաստ է պայքարել, եթե իր արժանապատվությունը վտանգված լինի», - ընդգծել է ժամանակավոր նախագահը:

Դրուզները մոտ մեկ միլիոն արաբ կրոնական փոքրամասնություն են, որոնք ապրում են Իսրայելում, Սիրիայում և Լիբանանում։

Մասնավորապես, Սիրիայի հարավում գտնվող Աս-Սուվեյդա նահանգում, ավելի քան մեկ տասնամյակ տևած քաղաքացիական պատերազմի ընթացքում, դրուզները բազմիցս հայտնվել են Բաշար ալ-Ասադի ռեժիմի կառավարական ուժերի և արմատական ​​զինյալների միջև խաչաձև կրակի տակ։