Փաշինյանի հերթական նվերը Ալիևին

Գլխավոր դատախազությունը Կադաստրի կոմիտեի դեմ հայց է ներկայացրել վարչական դատարան՝ պահանջելով անվավեր ճանաչել Երևանում ԼՂ կառավարության սեփականության իրավունքի պետական գրանցումը: Խոսքը Արաբկիր համայնք, Նաիրի Զարյան փողոց թիվ 17Ա հասցեում գտնվող` ԼՂՀ ներկայացուցչության շենքի, սեփականության իրավունքի պետական գրանցումը անվավեր ճանաչելու մասին է: Այսկերպ, կառավարությունը փորձում է խլել արցախցիների հավաքատեղի և պետական ինստիտուտների տեղակայման վայրի կարգավիճակ ունեցող շենքը` ուղերձ հղելով ադրբեջանցիներին, որ վճռական է Արցախի էջը փակելու և ցանկացած դիմադրություն կոտրելու հարցում:

2017-ից Լեռնային Ղարաբաղի կառավարության սեփականությունն է դարձել: Արցախի կորստից ու հայաթափումից հետո սա միակ տարածքն է, որ մնացել է Արցախի կառավարության անունով: Բռնի տեղահանված արցախցիների, վտարանդի կառավարության, պատգամավորների հետ կապի միակ տարածքն է: Սոցիալական բազմաթիվ խնդիրներ ունեցող արցախցիներն էլ առաջինն այս դռներն են թակում, այդ շենքի մոտ են իրենց բողոքն արտահայտում։

Եվ Երևանում ԼՂՀ ներկայացուցչության գոյությունը մտահոգում է թե՛ Ադրբեջանին, թե՛ նրանց խամաճիկը դարձած ՀՀ իշխանություններին։ Արդեն ամիսներ շարունակ խոսակցություններ կային, որ իշխանությունը ցանկանում է արցախցիներին զրկել վերջին հավաքատեղիից, ու այժմ անցել են գործնական հարթություն։ Ըստ ամենայնի, Փաշինյանի իշխանության այս որոշումը նոր բողոքի ալիք կբարձրացնի, բայց եթե այդ ալիքը նախկինների պես փոքր և անկազմակերպ լինի, այս դեպքում էլ Փաշինյանը կմարսի իր արարքը, Ալիևին էլ հերթական անգամ ցույց կտա իր հավատարմությունը։

Լալա Մուրադյան