ՔՊ-ականները դիվոտում են առաջին նախագահի ողջամիտ խոսքից

Նիկոլ Փաշինյանն ու իր կողմնակիցներն առանձնակի մոլագարությամբ են արձագանքում առաջին նախագահի՝ եկեղեցուն աջակցող հայտարարություններին։ Լևոն Տեր-Պետրոսյանը երեկ քննադատել է Նիկոլ Փաշինյանի՝ Էջմիածնի հրապարակում հանրահավաք անցկացնելու հայտարարությունը: Նրա խոսքով, Փաշինյանը նպատակ ունի ջախջախել Հայ Առաքելական Եկեղեցուն աջակցող ուժը: Տեր-Պետրոսյանը Փաշինյանի այդ քայլն արտառոց ու վտանգավոր է համարում՝ շեշտելով, որ իշխանության բոլոր քայլերն ուղղված են կայունությունը խախտելուն և երկրում խառնաշփոթ ստեղծելուն։

Ստեղծված իրավիճակից ելքը Տեր-Պետրոսյանը տեսնում է միմյանց հասցեին հնչող հայհոյախառն արտահայտություններն ու սպառնալիքները դադարեցնելը: «Իմ կարծիքով՝ հակադիր ուժերի դիմակայության վերացմանը կամ թեկուզ դրա մեղմացմանը մեծապես կնպաստեր Վաղարշապատում նախատեսված հանրահավաքի չեղարկումը և քաղբանտարկյալների, առաջին հերթին, Բագրատ և Միքայել Սրբազանների և Սամվել Կարապետյանի ազատ արձակումը։ Այսօր դա է Հայաստանի ներքաղաքական լարվածության թուլացման միակ միջոցը», - շեշտել է առաջին նախագահը։ Ավելին, վստահություն է հայտնել, որ իր առաջարկած լուծումը ոչ միայն չի վնասի Փաշինյանի հեղինակությանը, այլ ընդհակառակը՝ «պետական այրին վայել այդ քայլը կգնահատվի համայն հայության կողմից»։

Առաջին նախագահի այս մտահոգությանը և ողջամիտ առաջարկին, ինչպես և սպասելի էր, իշխանական քարոզչամեքենան պատասխանեց հայհոյանքներով, իսկ առաջատար դերը կրկին նախկին կոնգրեսականներինն էր, որոնք, դավաճանելով իրենց նախկին առաջնորդին, մինչ օրս ստիպված են հավատարմության երդումներ տալ Փաշինյանին, հայհոյել առաջին նախագահին։ Է՛լ «Հիմնադիր բայղուշ», է՛լ «ԼՏՊ», է՚լ «Տեր-Պետրոսյանն ո՞ւր, Փաշինյանն՝ ո՞ւր» տիպի արտահայտություններ, որոնք առաջին հերթին բնորոշում են հենց Փաշինյանին ու իր կողմնակիցներին։

Մինչդեռ, Տեր-Պետրոսյանը, կարելի է ասել, փրկության ճանապարհ էր ցույց տվել, որը թույլ կտար Նիկոլ Փաշինյանին պահպանել իր դեմքը, կամ գոնե վերջին փշուրները։ Բայց գործող իշխանությունները, իրենց բնույթին հավատարիմ, ընտրել են մինչև վերջ խայտառակվելու ուղին։

Աննա Գասպարյան