Սիրիայում Ասադի տապալումից հետո առաջին անգամ ընտրություններն կանցկացվեն

Սեպտեմբերի 15-ից 20-ը Սիրիայում կանցկացվեն Ժողովրդական խորհրդի (Մաջլիս ալ-Շաաբ)՝ տեղական խորհրդարանի վաղաժամկետ ընտրություններ: Այս մասին կիրակի՝ հուլիսի 27-ին, հայտնել է սիրիական պետական «Սանա» լրատվական գործակալությունը՝ հղում անելով հունիսին ստեղծված երկրի ընտրական հանձնաժողովի նախագահ Մոհամմադ Թահա ալ-Ահմադին:

Մեկ օր առաջ ալ-Ահմադը ներկայացրել էր Սիրիայի անցումային նախագահ Ահմեդ ալ-Շարաայի (հայտնի է նաև որպես Մոհամմադ ալ-Ջուլանի) ընտրություններ անցկացնելու ծրագրերը։

Սիրիայի ընտրական հանձնաժողովի ղեկավարի խոսքով՝ ալ-Շարաայի կողմից համապատասխան հրամանագիրը ստորագրելուց հետո երեք շաբաթվա ընթացքում Սիրիայում կձևավորվեն ընտրական մարմիններ, որից հետո թեկնածուները կկարողանան ներկայացնել համապատասխան դիմումներ և անցկացնել բանավեճեր։

Ըստ ծրագրի՝ Հանրապետության Ժողովրդական խորհուրդը կներառի 210 խորհրդարանական։ Սակայն նրանցից միայն երկու երրորդը կընտրվի քաղաքացիների քվեարկությամբ. մնացած 70-ը կնշանակվի երկրի նախագահի կողմից։ Անցումային շրջանում խորհրդարանը պատասխանատու կլինի Սիրիայի համար նոր օրենսդրության ձևավորման և երկրի համար մշտական սահմանադրության ստեղծմանը նպաստելու համար։

Մարտին ալ-Շարաան ստորագրեց անցումային շրջանի սահմանադրական հռչակագիր, որի համաձայն՝ ժամանակավոր խորհրդարանի լիազորությունների ժամկետը սկզբում կլինի երեք տարի, որից հետո այդ մարմինը կարող է վերընտրվել։

Միաժամանակ, Ժողովրդական խորհուրդը կունենա պետության ղեկավարին պաշտոնանկ անելու կամ նրա լիազորությունները սահմանափակելու իրավունք։ Միաժամանակ, փաստաթղթում սահմանվում է, որ սկզբնական փուլում բարձրագույն գործադիր իշխանությունը կիրականացնի միայն նախագահը։

Սիրիայում Բաշար ալ-Ասադի կառավարման տարիներին Ժողովրդական խորհրդի ընտրություններն անցկացվեցին բազմաթիվ խախտումներով, և, ինչպես կանխատեսվում էր, հաղթող ճանաչվեց բռնապետի կուսակցությունը։ Սիրիական ընդդիմությունը և մի շարք արևմտյան երկրներ չճանաչեցին քվեարկության արդյունքները։