Փաշինյանի իշխանությունը՝ մամուլի թշնամի

Հայաստանի բոլոր իշխանությունների մեջ ամենաշատ լրագրողները Նիկոլ Փաշինյանի իշխանության օրոք են, ավելին, ինքն էլ՝ Փաշինյանը երկարամյա լրագրող և խմբագիր է, թեպետ ավելի շատ հայտնի էր իր դեղին մամուլային հակումներով։

Այդուհանդերձ, հենց Փաշինյանի թիմն է իշխանության գալուց անմիջապես հետո պատերազմ հայտարարել մամուլին և փորձում է բոլոր միջոցներով ճնշել։ 2018 թվականի իշխանափոխությունից հետո Փաշինյանի ու իր «լրագրող» թիմակիցների ջրերը լրատվամիջոցների ազատ մամուլի հետ մի առվով երբեք չեն հոսել, և Փաշինյանն էլ առիթը բաց չի թողնում նեղել, վնասել տարբեր ԶԼՄ-ներին, հատկապես նրանց, ովքեր արձանագրում են գործող իշխանությունների կեղծիքները, խոստումներ չկատարելը, դավաճանությունը, տասնյակ ու 100-ավոր փաստեր։

ԶԼՄ-ների և լրագրողների դեմ ամենաշատ թվով դատական հայցերը հենց քպականներն են ներկայացնում։ Այժմ էլ փորձում են ազատել Մամուլի շենքը՝ ամբողջությամբ հեռացնելով այնտեղ գտնվող լրատվամիջոցներին։ Նշենք, որ դեռևս 90-ականներին Մամուլի շենքի տարբեր հարկաբաժիններ կամ սենյակներ անհատույց օգտագործման իրավունքով տրվել են տարբեր լրատվամիջոցների, և նրանք տասնամյակներ շարունակ գործել են այդ տարածքներում, իսկ այսօր հենց լրագրողներից բաղկացած իշխանությունն է ազատում այդ տարածքը, առանց պատճառի հրաժարվում պայմանագիր կնքել և լրատվամիջոցներից պահանջում է հեռանալ Մամուլի շենքից։

Իհարկե, քաղաքի կենտրոնում գտնվող այդ շենքը բավական համեղ պատառ է տարբեր անձանց իշխանության, իշխանությանը սերտ օլիգարխների համար։ Բայց այն, որ գործող իշխանությունները կհանդգնեն նման սրիկայության, վեր է բոլոր տեսակի պատկերացումներից։

Նանե Մուկուչյան