Իրանի զինված ուժերը, ի պատասխան ցանկացած հարձակման, ԱՄՆ-ին և Իսրայելին «նոր անակնկալներ» են խոստացել

Իրանի զինված ուժերի գլխավոր շտաբը նախազգուշացրել է ԱՄՆ-ին և իսրայելական ռեժիմին, որ ցանկացած վերսկսված ագրեսիա կարժանանա ավելի դաժան պատասխանի, քան հունիսյան 12-օրյա պատերազմի ժամանակ՝ զգուշացնելով, որ Իրանը «անակնկալներ» է պատրաստում, հայտնում է Tasnim-ը։

Շաբաթ օրը հրապարակված հայտարարության մեջ Իրանի զինված ուժերի գլխավոր շտաբը նշել է 1990-ականներին Իրաքից ռազմագերիների ազատագրման տարելիցը։

Հայտարարությունը խիստ նախազգուշացում էր պարունակում «հանցավոր ու չարամիտ ԱՄՆ-ի  և վայրի սիոնիստական ռեժիմի համար»՝ դադարեցնել դավեր նյութելն անպարտելի իրանցի ազգի դեմ։

Իրանն ապացուցել է, որ ոչ մի տերություն չի կարող նրա հետ խոսել ուժի և սպառնալիքների լեզվով, ասված է հայտարարության մեջ։

Այն նաև խիստ քննադատության է ենթարկել ԱՄՆ-ին և Իսրայելին «անցյալից դասեր քաղելու անկարողության և հունիսին Իրանի դեմ ագրեսիվ պատերազմ սանձազերծելու համար»՝ հայտարարելով, որ նրանց գործողություններն ավարտվել են «նվաստացուցիչ և տխուր ձախողմամբ»։

Գլխավոր շտաբը նախազգուշացրել է ԱՄՆ-ին և Իսրայելին, որ սխալ հաշվարկի ցանկացած կրկնություն կամ նոր չարամիտ ագրեսիա կդիմավորվի Իրանի կողմից «նոր անակնկալներով» և կհանգեցնի շատ ավելի կործանարար և ջախջախիչ միջոցների՝ ընդգծելով, որ այն, ինչը Իրանին ստիպել է զսպվածություն դրսևորել և խանգարել է նրա լայնածավալ գործողություններին 12-օրյա պատերազմի ընթացքում, այլևս չի կրկնվի։