Գազայում մեկ օրում սովից 11 մարդ է մահացել

Վերջին 24 ժամվա ընթացքում Գազայի հատվածում սովից մահացել է առնվազն 11 պաղեստինցի, այդ թվում՝ երկու երեխա։ «Արմենպրես»-ի փոխանցմամբ, տվյալները հրապարակվել են Գազայի առողջապահության նախարարության Telegram-ի ալիքում։

Նախարարության տվյալներով՝ թերսնման հետևանքով Գազայի մահացած բնակիչների ընդհանուր թիվը հասել է 300-ի, նրանցից 117-ն անչափահասներ են։

Օգոստոսի 21-ին Գազայի իշխանությունները հայտնել էին, որ 3.5 շաբաթվա ընթացքում Գազայի հատված է մտել մարդասիրական օգնություն տեղափոխող մոտ 2000 բեռնատար, ինչը կազմում է անկլավի բնակչությանը անհրաժեշտ պաշարների ծավալի 15%-ից պակաս։ Վերջին 25 օրվա ընթացքում Գազա պետք է ժամաներ մարդասիրական օգնություն տեղափոխող առնվազն 15000 մեքենա, սակայն Իսրայելը Գազայի հատված թույլատրել է միայն 2187 բեռնատարի մուտքը։