Հայտարարում ենք «Մեր ձևով» ապաքաղաքական կամավորական շարժման հիմնադրման մասին. Նարեկ Կարապետյան (Տեսանյութ)

Այսօր մենք՝ ազգային բարերար Սամվել Կարապետյանի համախոհներն ու գործընկերները, հայտարարում ենք «Մեր ձևով» կամավորական շարժման հիմնադրման մասին». «Մեր ձևով» ժողովրդական շարժման շնորհանդեսին հայտարարեց շարժման համակարգող խորհրդի գլխավոր պատասխանատու Նարեկ Կարապետյանը, ով «Տաշիր» ընկերությունների խմբի փոխնախագահն է և Կարեն Կարապետյանի որդին։

Նա պարզաբանեց, թե ինչ է նշանակում կամավորական շարժում և ինչու են իրենք հայտարարում շարժման, այլ ոչ թե կուսակցության ստեղծման մասին։

«Կամավորական շարժումը այն հարմար ձևաչափն է, որը թույլ կտա, առանց հասարակությանը բաժանելու, համախմբել մարդկանց՝ լավ, մեծ ու բարի գործեր անելու համար։ «Մեր ձևով» ժողովրդական շարժումն ապաքաղաքական կամավորական միավորում է՝ այն մարդկանց համար, ովքեր պատրաստ են անձնուրաց ծառայել հանուն օգտակար նպատակների։ Շարժման մասնակիցները կարող են լինել տարբեր մասնագիտությունների և հայացքների տեր մարդիկ, ովքեր կցանկանան իրենց ազատ ժամանակը նվիրել այս գործին», – նշեց նա։

Նարեկ Կարապետյանը հաստակեցրեց, թե այս շարժման ստեղծմամբ արդյո՞ք նշանակում է, որ ինչպես Սամվել Կարապետյանն էր ասում սկզբունքորեն նոր քաղաքական ուժ չեն ստեղծելու.

«Ո՛չ, չի նշանակում։ Սա մեր կատարելիք աշխատանքի միայն առաջին փուլն է։ Հայաստանում առաջիկայում սպասվում են ընտրական գործընթացներ, և դրանց մասնակցության առավել հարմար ձևը կուսակցության միջոցով ներգրավվելն է, պետական ծրագրերի իրականացման համար համապատասխան ծրագրեր առաջարկելով։ Վստահ ենք, որ 2026-ի ընտրական գործընթացներում կկարողանանք արժանի արդյունքի հասնել», – ասաց նա։