Ռուսաստանը զանգվածային հրթիռային և դրոնային հարված է հասցրել Ուկրաինային

Ռուսաստանի զինված ուժերը օգոստոսի 30-ի գիշերը զանգվածային հարված են հասցրել Ուկրաինայի տարածքին՝ կիրառելով հարվածային անօդաչու թռչող սարքեր, ինչպես նաև օդային, ցամաքային և ծովային բազավորման հրթիռներ։ Ինչպես տեղեկացնում է «Արմենպրես»-ը, այս մասին հայտնել է Ուկրաինայի ԶՈՒ օդուժի հրամանատարությունը։

Նշվում է, որ հակաօդային պաշտպանության ուժերը հայտնաբերել են 582 թիրախ, որոնց թվում՝ 537 «Շահեդ» տիպի դրոններ և նմանակող ԱԹՍ-ներ, ութ «Իսկանդեր-Մ/ԿՆ-23» բալիստիկ հրթիռներ և 37 թևավոր ու ավիացիոն հրթիռներ՝ «Կալիբր», Իքս-101, «Իսկանդեր-Կ» ու X-59։

Առավոտյան ժամը 9-ի դրությամբ ուկրաինական ՀՕՊ-ը խոցել կամ ճնշել է 548 թիրախ՝ այդ թվում 510 դրոն, վեց բալիստիկ և 32 թևավոր հրթիռ։ Միաժամանակ արձանագրվել են հինգ հրթիռի և 24 «Շահեդի» հարվածներ յոթ վայրերում, ինչպես նաև 21 դեպք՝ խոցված թիրախների բեկորների անկման հետևանքով։

Զապորոժյեի մարզի ռազմական վարչակազմի ղեկավար Իվան Ֆյոդորովի խոսքով՝ գիշերային հարվածների հետևանքով վնասվել է 14 բազմահարկ շենք, ավելի քան 40 առանձնատուն, ինչպես նաև արդյունաբերական ձեռնարկություններ։ Վերջին տվյալներով՝ զոհվել է մեկ քաղաքացի, վիրավորվել՝ 24-ը, այդ թվում՝ երեք երեխա։ Տասներկու վիրավոր տեղափոխվել է հիվանդանոց։

Ռուսական զորքերը համակցված հարված են հասցրել նաև Դնեպրոպետրովսկի մարզին։ Տարածաշրջանի ղեկավար Սերգեյ Լիսակի փոխանցմամբ՝ Դնեպրում և Պավլոգրադում վնասվել են ենթակառուցվածքային օբյեկտներ, Նիկոպոլ համայնքում՝ ձեռնարկություն և բենզալցակայան։ Վիրավորների մասին տեղեկություններ չկան։