Իրանը կշարունակի ուրանի հարստացումը, սակայն միջուկային զենքի ստեղծում օրակարգում չկա. Այաթոլլահ Խամենեի

Իրանի գերագույն առաջնորդ այաթոլլահ Սեյեդ Ալի Խամենեին հայտարարել է, որ Իրանը կշարունակի ուրանի հարստացումը, սակայն միջուկային զենքի մշակում օրակարգում չկա, հաղորդում է Mehr-ը։

Իր հեռուստատեսային ելույթի սկզբում առաջնորդը հայտարարել է, որ կկենտրոնանա իրանցի ազգի միասնության, ուրանի հարստացման և Միացյալ Նահանգների հետ բանակցությունների վրա։ Նա մատնանշել է հունիսին թշնամու կողմից երկրին պարտադրված վերջին 12-օրյա պատերազմը՝ հայտարարելով, որ ագրեսորների նպատակն էր տապալել իսլամական կարգը։ Այաթոլլահ Խամենեին նշել է, որ Իրանի միասնությունը խափանել է ազգը պառակտելու և իսլամական կարգը տապալելու թշնամու դավադրությունը։ Նա նշել է, որ 12-օրյա պատերազմից ամիսներ անց երկիրը շարունակում է պահպանել իր միասնությունը։

Ուրանի հարստացման վերաբերյալ այաթոլլահ Խամենեին նշել է, որ Իրանը և մյուս կողմը՝ արևմտյան երկրները, հարստացման հարցում տարաձայնություններ ունեն։

Նա միաժամանակ պարզաբանել է, որ ուրանի հարստացումը կիրառություն ունի տարբեր ոլորտներում, մասնավորապես գյուղատնտեսության, արդյունաբերության, սննդի, շրջակա միջավայրի պաշտպանությունան և բնական պաշարների պահպանման մեջ, ինչպես նաև էլեկտրաէներգիայի բնագավառում։

Ըստ առաջնորդի՝ Իրանն ունի բարձր հարստացված ուրան արտադրելու կարողություն, միևնույն ժամանակ միջուկային զենքի մշակում օրակարգում չկա։ Առաջնորդը նշել է, որ իրանական որոշ միջուկային օբյեկտների ռմբակոծումը չի կարող խանգարել Իրանին հարստացնել ուրանը, քանի որ դրա արտադրությունը դարձել է տեղական գիտություն։ Նա հավելել է, որ Իրանն ունի տասնյակ, նույնիսկ հարյուրավոր հարստացման մասնագետներ: