Հինգ տարի անց Փաշինյանը ցանկանում է մոռացության մատնել պատերազմի զոհերին

5 տարի առաջ այս օրը պայթեց 44-օրյա պատերազմը։ Ադրբեջանը Թուրքիայի աջակցությամբ հարձակվեց Արցախի քաղաքացիական բնակչության դեմ, գրավեց Արցախի Հադրութի շրջանը, Շուշին, Ղարաբաղին հարակից հայկական վերահսկողության տակ գտնվող հարավային շրջանները։ Հայկական կողմը հազարավոր զոհեր ունեցավ։ Ի վերջո, հրադադարը հաստատվեց նոյեմբերի 9-ի եռակողմ հայտարարությամբ։ Երեք տարի անց էլ Ադրբեջանը նույն սեպտեմբերին իրականացրեց Արցախի հայաթափումը՝ Նիկոլ Փաշինյանի լռելյայն համաձայնությամբ և թողտվությամբ։

Պատերազմի 5-րդ տարելիցը «Քաղաքացիական պայմանագիրն» առանձնապես ցանկություն չունի հիշելու։ Միայն Փաշինյանն է ֆեյսբուքյան իր էջում լուսանկար տեղադրել և գրել. «Փառք նահատակներին և կեցցե Հայաստանի Հանրապետությունը»։ Ինքը Փաշինյանն այս օրերին Նյու Յորքում է, իսկ սեփական կուսակցությունից և իշխանությունից որևէ մեկը Եռաբլուր այդպես էլ չի այցելել, հարկ չի համարել հարգել 1000-ավոր զոհերի հիշատակը։

Ավելին, նախօրեին Ազգային ժողովի փոխնախագահ Ռուբեն Ռուբինյանը հայտարարել է, որ «Հիշատակի և խոնարհումի օրվա մասին օրենքի» նախագիծ են դնում շրջանառության մեջ, իսկ որպես հիշատակի օր ընտրել են հունվարի 27-ը, իբր հարգելու բոլոր ռազմական գործողությունների զոհերին։ Սա ևս մեկ անգամ վկայում է «Քաղպայմանագրի» մոտեցումը՝ ամեն գնով մոռանալ թե՛ Արցախը, թե՛ 44-օրյա խայտառակ պատերազմը, որտեղ հայկական կողմը պարտություն կրեց հենց իշխանության գործողությունների հետևանքով։

Եվա Միքայելյան