Առաջարկվել է կենսաթոշակի տարիքը բարձրացնել՝ հասցնելով մինչև 73 տարեկանը

Գերմանիայի դաշնային կառավարության գիտա​​խորհրդատվական խորհուրդն առաջարկել է աստիճանաբար բարձրացնել կենսաթոշակի տարիքը մինչև 73 տարեկան՝ հաշվի առնելով ժողովրդագրական միտումները, գրում է Bild-ը։

Իր զեկույցում գիտա​​խորհրդատվական խումբը, որը ներառում է չորս գերմանացի տնտեսագետ, կոչ է անում անհապաղ բարեփոխել կենսաթոշակային համակարգը։

Նրանք հավելել են, որ Գերմանիայում տնտեսական արդյունքը երկար ժամանակ լճացել է արտադրողականության անբավարար աճի և ժողովրդագրական կառուցվածքային խնդիրների պատճառով։

«Մենք պետք է ավելի շատ աշխատենք, եթե ցանկանում ենք պահպանել սոցիալական ապահովագրության համակարգի չափն՝ առանց ապագա սերունդների վրա ավելի մեծ բեռ թողնելու։ Կենսաթոշակային տարիքը պետք է կապված լինի կյանքի տևողության հետ»,- ասում են հեղինակները։

Որպես օրինակ՝ փորձագետները մեջբերում են Դանիան, որտեղ կենսաթոշակի տարիքը հիմնված է կյանքի տևողության վրա և, ըստ ներկայիս գնահատականների, մինչև 2040 թվականը կբարձրանա մինչև 70 տարեկան։

Գերմանիայում կենսաթոշակի տարիքը ներկայում 65 տարեկան է, բայց մինչև 2031 թվականը նախատեսվում է բարձրացնել մինչև 67 տարեկան։ 2006 թվականից ի վեր այն շարունակ ճշգրտվել է կյանքի տևողությանը համապատասխան։