«Մեր ձևով» շարժումը մարզերում առաջին քայլը սկսեց Գյումրիից

Հոկտեմբերի 4-ին Գյումրիում՝ Հասմիկ Կիրակոսյան 34 հասցեում, բացվեց «Մեր ձևով» շարժման առաջին մարզային գրասենյակը։ Գրասենյակը ստեղծվել է ձեռնարկատեր և բարերար Սամվել Կարապետյանի նախաձեռնությամբ։

«Մեր ձևով» շարժման առաջին մարզային գրասենյակի բացման միջոցառմանը ներկա էին Գյումրիի բնակիչներ, նախաձեռնության անդամներ և տեղական ակտիվիստներ։ Գրասենյակը ներկայացվում է ոչ միայն որպես աշխատանքային տարածք, այլև որպես հանդիպումների և քննարկումների վայր նրանց համար, ովքեր ցանկանում են մասնակցել քաղաքում և համայնքում փոփոխությունների ծրագրերին։

Շարժման համակարգող Նարեկ Կարապետյանը լրագրողների հետ զրույցում ընդգծեց Գյումրիի նշանակությունը շարժման համար․

«Գյումրին կարևոր քաղաք է մեզ համար։ Այսօր Գյումրիի օրն է, և որոշեցինք հենց այս օրը բացել մեր առաջին մարզային գրասենյակը։ Այս պահին աշխատում ենք «Վառեմ-Մառեմ» շենքի վերականգնման վրա։ Այն ավարտելուց հետո կներկայացնենք մեր հաջորդ քայլերը և շուտով կներկայացնենք նաև Գյումրիի զարգացման ամբողջական տեսլականը»։

Նարեկ Կարապետյանը նշեց նաև, որ շարժման քաղաքական ձևավորման գործընթացը կարող է սկսվել արդեն 2026 թվականի հունվարից։

Գյումրիում բացված այս գրասենյակը շարժման առաջին մարզային կենտրոնն է, որը նախատեսվում է դարձնել քննարկումների, գաղափարների և նախագծերի հարթակ։ Շարժման անդամները հայտարարում են, որ նպատակ ունեն ներգրավել տեղի բնակիչներին՝ նրանց խնդիրներն ու առաջարկները ներառելով առաջիկա ծրագրերում։