Իշխանությունը Վաղարշապատում դիմում է ամենակեղտոտ մեթոդներին

Վաղարշապատում շարունակում է ավագանու ընտրությունների քարոզարշավը, շարունակում է նաև գործող իշխանության կողմից տարատեսակ կեղծիքները և ընտրախախտումները, որոնք այնքան ակնհայտ են, որ նույնիսկ Նիկոլ Փաշինյանին լոյալ իրավապաշտպանները չեն դիմանում և հանցագործության մասին հաղորդումներ են ներկայացնում դատախազությանը: Նշենք, որ դատախազությունը Վաղարշապատի ընտրությունների նախաշեմին բարեգործություն կատարելու փաստի ուսումնասիրման հարցն ուղարկել է Հակակոռուպցիոն կոմիտե:

Չի բացառվում, որ քրեական գործ չհարուցեն, բայց և ակնհայտ է, որ փաշինյանական իշխանությունը, որը սիրում է խոսել օրենքի տառից, հենց ինքն է թաթախված ընտրակեղծիքների և իրավախախտումների մեջ: Երեկ էլ հայտնի է դարձել, որ իշխանական թեկնածու Արգիշտի Մեխակյանի շտաբի վարչական ռեսուրսները ամբողջությամբ ներգրավվել են ընտրապայքարի մեջ, դիմելով անգամ ամենակեղտոտ մեթոդներին:

Իշխանական սպասարկուները համակարգված ձևով պոկում են մրցակից թեկնածուների պաստառները: Մասնավորապես, պոկել էին «Հայրենիք» կուսակցության թեկնածու Խաչիկ Մանուկյանի պաստառները, թողնելով միայն Մեխակյանի պաստառները: Նման դեպքեր գրանցվել են Վաղարշապատի հարակից գյուղերում:

Ըստ էության, գործող իշխանությունները չափազանց մտահոգված են, վախեցած, թե ինչ արդյունք կարող է լինել Վաղարշապատում, որտեղ պարտությունը անդառնալիորեն հարվածելու է Փաշինյանի հեղինակության վերջին նշույլներին, ուստի և չեն խորշում վատթարագույն մեթոդներին դիմելուց: Այնպիսի մեթոդների, որոնք նույնիսկ նախկին իշխանությունների օրոք չէին կիրառվում: Փաշինյանական իշխանությունը վաղուց հատել է բոլոր կարմիր գծերը և շարունակում է նոր հատակներ ծակել:

Դիանա Հակոբյան