Ցորենի գնացքներն ու իշխանականների ցնծագին աղմուկը

Ռուսական ցորենով բեռնված գնացքը (15 վագոն) ժամանել է Հայաստան՝ անցնելով Ադրբեջանի և Վրաստանի տարածքով։ «Դեպի Հայաստանի բեռնափոխադրումների սահմանափակումների վերացումը Ադրբեջանի կողմից կարևոր քայլ է տարածաշրջանային հաղորդակցությունների վերականգնման և տնտեսական համագործակցության խթանման ուղղությամբ։ Այն հանդիսանում է Վաշինգտոնում ձեռք բերված պայմանավորվածությունների գործնական իրականացումներից մեկը՝ նպաստելով Հայաստանի և Ադրբեջանի միջև հաստատված խաղաղության ինստիտուցիոնալացմանը», - ասված է վարչապետի աշխատակազմի հայտարարությունում։

Իշխանական քարոզչամեքենան և պաշտոնյաները այնպիսի աղմուկ-աղաղակ են բարձրացրել, որ կարծես պատմական հաղթանակ են տարել։ Էկոնոմիկայի նախարար Գևորգ Պապոյանը ցորենի առաքումը պատմական քայլ է որակել, միևնույն ժամանակ նշել, թե ցորենը գնել է մասնավոր ընկերություն և տեղափոխել Հայաստան։

Ռուսաստանի տրանսպորտի նախարարությունն էլ հայտնել է, որ մինչև 2026 թ. հունվարի վերջ նախատեսվում է Ադրբեջանի տարածքով Հայաստան տեղափոխել ցորենով լի ևս 132 երկաթուղային վագոն։ Քննարկվում է նաև այլ բեռների տեղափոխումը։ Առաջիկայում էլ Հայաստան կհասնի ղազախական ցորենը։

Ցորենի շուրջ նման ցնծությունը արդարացված կլիներ միայն մի դեպքում, եթե Հայաստանը լիներ ինքնաբավ երկիր, և մեր ցորենը գնացքով արտահանվեր այլ երկիր։ Կամ էլ՝ ռուսական և ղազախական ցորենի ներմուծումից հետո հացի և հացամթերքների գինը նվազեր։ Մինչդեռ նման հեռանկարի հույսերը խիստ մշուշոտ են։ Հանրությունն ինչպես թանկ գնով գնել է հացը, այնպես էլ շարունակելու է, իսկ արդյունքում հարստանալու են մերձիշխանական օլիգարխներն ու նրանց հովանավորները։ Սննդի անվտանգության մասին խոսելն էլ ավելորդ է։

Անի Արզումանյան