«Մեր ձևով»՝ գործող շարժում, որը միավորում է համայնքներն ու մարդկանց

«Մեր ձևով» շարժումը շարունակում է իր ինտենսիվ աշխատանքային գործունեությունը՝ ամրապնդելով ներկայությունը թե՛ Հայաստանի տարբեր համայնքներում, թե՛ սփյուռքի շրջանակներում։ Շարժմանն օր օրի միանում են հայրենասերներ, որոնք իրենց մասնակցությամբ նոր շունչ են հաղորդում նախաձեռնությանը։ Այսօր արդեն շարժումն ունի գործող գրասենյակներ Գյումրիում, Վանաձորում, Սևանում և մի շարք այլ քաղաքներում, ինչը վկայում է ծրագրավորված և հետևողական աշխատանքային ընթացքի մասին։

Շարժման հիմնական ուղղություններից է երկրի տնտեսական և հասարակական ակտիվության բարձրացումը։ «Մեր ձևով»-ը վստահություն է ներշնչում մարդկանց՝ իր գործունեությամբ ապացուցելով, որ փոփոխությունները սկսվում են նախաձեռնությունից և համախմբվածությունից։ Այդ հավատն այսօր արտացոլվում է նաև հասարակական հետաքրքրության մակարդակում․ շարժման գործունեության շուրջ ձևավորվում է վստահության և հույսի նոր միջավայր։

Վերջին օրերին շարժման ներկայացուցիչները այցելել են Տավուշի մարզի Աչաջուր գյուղ։ Այցի շրջանակում նրանք հանդիպել են «Աչաջուր» ֆուտբոլային ակումբի ներկայացուցիչների և պատանի մարզիկների հետ՝ նրանց փոխանցելով սեպտեմբերյան այցի ժամանակ խոստացված նվերները։ Ակումբը ստացել է մարզումների և խաղերի համար անհրաժեշտ նոր մարզական սարքավորումներ, կահույք և բոլոր տարիքային խմբերի համար նախատեսված համազգեստներ։

Այս նախաձեռնությունը մեծ նշանակություն ունի գյուղի երիտասարդության համար։ Տարիներ շարունակ սեփական ուժերով պահպանված ֆուտբոլային ավանդույթներն այժմ ստանում են նոր խթան։ Շարժման ներկայացուցիչները շեշտել են, որ «Մեր ձևով»-ը նպատակ ունի խրախուսել առողջ ապրելակերպը, խթանել մարզական ու քաղաքացիական ակտիվությունը և ձևավորել նոր, նախաձեռնող սերունդ։
«Մենք հավատում ենք, որ մարզական միջավայրի զարգացումը ոչ միայն ուժեղացնում է համայնքը, այլև ձևավորում է համախմբված ու նպատակասլաց սերունդ», — ընդգծել են նախաձեռնության անդամները։

Աչաջուրի մարզիկները շնորհակալություն են հայտնել աջակցության և ուշադրության համար՝ նշելով, որ նոր գույքն ու համազգեստները մեծ խթան են լինելու առաջիկա հաջողությունների համար։ Հանդիպման ընթացքում կողմերը քննարկել են նաև հետագա համագործակցության հնարավորություններ՝ կապված համայնքային զարգացման և երիտասարդական այլ նախաձեռնությունների իրականացման հետ։

«Մեր ձևով» շարժման նման ծրագրերը ապացուցում են, որ առողջ հասարակությունը կառուցվում է գործողության, ոչ թե խոսքի միջոցով։ Երբ յուրաքանչյուր համայնք ստանում է իր հնարավորությունը զարգանալու և հավատալու սեփական ուժերին, երկրի ապագան դառնում է ավելի ամուր։ Շարժման օրական աշխատանքը, տարածքային ներկայությունը և քաղաքացիների ներգրավվածությունը հստակ վկայում են՝ «Մեր ձևով»-ը ոչ միայն շարժում է, այլ նաև հզոր գաղափար՝ միավորված ազգային ինքնագիտակցությամբ ու համախմբվածությամբ։