Եվս մեկ նավատորմ մոտենում է Իրանին. Թրամփը հուսով է, որ Թեհրանը գործարք կկնքի

Միացյալ Նահանգների նախագահ Դոնալդ Թրամփը հայտարարել է, որ Իրանին ամերիկյան ևս մեկ նավատորմ է մոտենում։

«Արմենպրես»-ի հաղորդմամբ՝ ինչպես հայտնում է Սպիտակ տունը, ԱՄՆ նախագահն այս մասին հայտարարել է Այովա նահանգի բնակիչների առաջ ելույթի ընթացքում։

Դոնալդ Թրամփը, միաժամանակ, հույս է հայտնել, որ Թեհրանը «գործարքի» կգնա։

«Հիմա Իրանին ևս մեկ գեղեցիկ նավատորմ է մոտենում, այնպես որ կտեսնենք․․․ Հուսով եմ՝ նրանք գործարք կկնքեն»,-հայտարարել է Թրամփը։

Ավելի վաղ տարբեր ԶԼՄ-ներ հաղորդել էին, որ Իսրայելի պաշտպանության բանակը (ՑԱԽԱԼ) պատրաստվում է Իրանի վրա Ամերիկայի Միացյալ Նահանգների հարձակմանը, որը կարող է տեղի ունենալ արդեն առաջիկա հանգստյան օրերին։

Դեկտեմբերի 28-ից Իրանում լայնածավալ ցույցեր են սկսվել իրանական ռիալի կտրուկ արժեզրկման և մեծ գնաճի ֆոնին։ Հակակառավարական ցույցերն ուղեկցվել են բախումներով և անկարգություններով։ Իրանական պետական հեռուստաընկերությունը, հղում անելով դատաբժշկական կազմակերպությանը, հայտնել է, որ ցույցերի ընթացքում զոհվել է 3117 մարդ։

ԱՄՆ նախագահ Դոնալդ Թրամփը բազմիցս սպառնացել է ձեռնարկել շատ խիստ միջոցներ, եթե Իրանի իշխանությունները չդադարեցնեն բռնությունները և սկսեն մահապատժի ենթարկել Կառավարության դեմ բողոքի ակցիայի մասնակիցներին։

Հունվարի 23-ին ԱՄՆ նախագահ Դոնալդ Թրամփը հայտարարել է, որ ԱՄՆ ռազմական «հսկայական նավատորմ» է ուղևորվում դեպի Իրան։ Նա միաժամանակ հույս է հայտնել, որ ԱՄՆ-ն ստիպված չի լինի ուժ կիրառել։