Արամ Զավենիչն իր վրա է քաշում «արևմտամետի» թիկնոցը

«Հանրապետություն» կուսակցությունը մասնակցելու է առաջիկա խորհրդարանական ընտրություններին և կողմնորոշված է վարչապետի թեկնածուի ընտրության հարցում։ Կուսակցության առաջնորդ Արամ Սարգսյանը սոցցանցում հայտնել է, որ վարչապետի թեկնածուն ինքն է լինելու, որովհետև կարծում է, որ ՀՀ խորհրդարանում պետք է լինի ամբողջությամբ արևմտյան արժեքները պաշտպանող քաղաքական ուժ կամ ուժի ներկայացուցիչ։

Սարգսյանը հատուկ նշել է, որ ռուսամետների և «բալանսավորողների» ֆոնին պետք է խորհրդարանում լինի ամբողջապես արևմտամետ ուժ։ «Բալանսավորող» ասելով՝ «Հանրապետություն» կուսակցության նախագահը նկատի ունի հենց Նիկոլ Փաշինյանին, որի իշխանությունը հայտարարել է բալանսավորման քաղաքականություն վարելու մասին։ Եվ իր այս հայտարարությամբ, ինչպես նաև միայնակ մասնակցելով խորհրդարանական ընտրություններին՝ Արամ Սարգսյանը ցանկանում է ստանալ Արևմուտքի, Եվրամիության աջակցությունը՝ թե՛ քաղաքական և թե՛ ֆինանսական, որպեսզի կարողանա խմբակցություն ձևավորել Ազգային ժողովում։

Մի կողմից հասկանալի է Փաշինյանի կոալիցիոն գործընկերոջ այս վարքը, հատկապես իշխանությունների՝ չկողմնորոշված լինելու, ինչպես նաև որոշակի Ռուսաստանից վախեր ունենալու պայմաններում․ նա ցանկանում է իր վրա քաշել արևմտամետի թիկնոցը և ստանալ Եվրոպայից ստացվող գումարների առյուծի բաժինը։

Մյուս կողմից էլ չի բացառվում, որ արևմտյան խաղաքարտ օգտագործելով՝ հաջողվի հաղթահարել նվազագույն շեմը և հայտնվել խորհրդարանում, իսկ դրանից հետո արդեն թե՛ կաջակցեն իշխանությանը, և թե՛ որոշ դեպքերում կանցնեն շանտաժ անելու։

Մոնիկա Ազատյան