Ո՞վ կղեկավարի գործադիր իշխանությունը․ «Ուժեղ Հայաստան»-ը հայտարարում է վարչապետի իր թեկնածուին

Փետրվարի 11-ին կայացավ գործարար և բարերար Սամվել Կարապետյանի նախաձեռնած «Ուժեղ Հայաստան» կուսակցության համագումարը, որը կարելի է համարել նորաստեղծ քաղաքական ուժի ձևավորման կարևորագույն փուլերից մեկը։

Համագումարի ընթացքում ընտրվեցին կուսակցության նախագահն ու խորհուրդը, ձևավորվեցին կառավարման մարմինները և հստակեցվեցին առաջիկա քաղաքական քայլերը։

Սամվել Կարապետյանը միաձայն ընտրվեց կուսակցության նախագահ՝ ստանալով համագումարի մասնակիցների ամբողջական աջակցությունը։ Այս որոշմամբ փաստացի ամրագրվեց, որ քաղաքական նոր միավորի առանցքային դեմքն ու գաղափարական պատասխանատուն հենց նա է։ Համագումարի ընթացքում շեշտվեց, որ կուսակցությունը մտադիր է առաջիկա գործընթացներին մասնակցել հստակ ծրագրով և իշխանության հավակնությամբ։

Այսօր՝ փետրվարի 12-ին, ժամը 13։00-ին, Կարեն Դեմիրճյանի անվան մարզահամերգային համալիրում տեղի կունենա «Ուժեղ Հայաստան» կուսակցության պաշտոնական շնորհանդեսը։ Միջոցառման ընթացքում կհայտարարվի կուսակցության վարչապետի թեկնածուի անունը, ինչը, ըստ քաղաքական շրջանակների, կարող է էական ազդեցություն ունենալ ներքաղաքական զարգացումների վրա։

Կուսակցության համապատասխան բաժնից տեղեկացնում են, որ Հայաստանի և արտերկրի զանգվածային լրատվության միջոցների համար կապահովվի ուղիղ հեռարձակում՝ բաց հղումով։

Լրագրողները հնարավորություն կունենան միջոցառմանը հետևել դահլիճից՝ առանց նկարահանող խմբի։ Միջոցառման ավարտին մամուլի ասուլիս նախատեսված չէ։

Նշենք, որ վերջին շրջանում Սամվել Կարապետյանը, Հայ Առաքելական Եկեղեցու կողքին կանգնելու համար, ենթարկվում է պետական ապարատի ճնշումների։ Փետրվարի 11-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում հանդիպել է միջազգային իրավաբան Ռոբերտ Ամստերդամին։

Հանդիպման ընթացքում քննարկվել են անազատության մեջ գտնվող եպիսկոպոսների և ազգային բարերար Սամվել Կարապետյանի նկատմամբ ընթացող իրավական գործընթացները։ Զրուցակիցները անդրադարձել են մարդու իրավունքների պաշտպանության խնդիրներին՝ ընդգծելով արդարության և օրինականության պահպանման անհրաժեշտությունը։

Փետրվարի 12-ին կայանալիք միջոցառումը, ըստ կազմակերպիչների, պետք է դառնա ոչ միայն կուսակցության ծրագրային դրույթների ներկայացման հարթակ, այլ նաև քաղաքական նոր փուլ ազդարարող իրադարձություն։

Կուսակցության համակիրները վստահ են, որ «Ուժեղ Հայաստան»-ը կարող է ձևավորել նոր որակի քաղաքական օրակարգ և լայն հանրային աջակցություն ապահովել։ Առաջիկա ժամերին կհստակեցվի, թե ով է այն քաղաքական գործիչը, ում վստահվելու է վարչապետի թեկնածուի պատասխանատու առաքելությունը, և ինչ ուղերձներով է նոր ուժը մտնելու քաղաքական պայքարի դաշտ։