Գործող իշխանությունները մտադիր են ընտրություններից հետո բարձրացնել էլեկտրաէներգիայի սակագինը․ «Ուժեղ Հայաստան»

Միանշանակ կարող եմ ասել, որ Հայաստանում էլեկտրաէներգիայի սակագինը ընտրություններից հետո կբարձրանա, եթե հաղթանակ տանի գործող իշխանությունը։ Այս մասին փետրվարի 17-ին լրագրողների հետ հանդիպման ժամանակ հայտարարել է «Հայաստանի էլեկտրական ցանցեր» ՓԲԸ-ի նախկին գլխավոր տնօրենի պաշտոնակատար, «Ուժեղ Հայաստան» կուսակցության վարչության անդամ Դավիթ Ղազինյանը։

Նրա խոսքով՝ իշխանությունները ՀԱԷԿ-ի (Հայկական ատոմային էլեկտրակայանի) համար նախատեսել են, ինչպես իրենք են հայտարարում, 13 միլիարդ դրամի չափով «այլ ֆինանսական եկամուտներ», սակայն մինչ այժմ չեն պարզաբանել, թե ինչ եկամուտներ են դրանք: «Մենք կասկածներ ունենք, բայց մերկապարանոց հայտարարություններ չենք անելու, թող ասեն՝ ինչքան և որտեղից են գումարները ձեռք բերելու։ Մենք ունենք հիմնավոր կասկածներ, որ իշխանություններն ամեն ինչ արել են, որպեսզի մինչև 2026 թվականի ընտրությունները էլեկտրաէներգիայի սակագինը չբարձրանա»,- նշել է Ղազինյանը:

Նա հավելեց, որ իշխանությունները խոսում են կուտակային կայաններ կառուցելու ծրագրերի մասին, և եթե դա արվի, ապա արևային կայանների տեղադրումը կրկնակի անգամ կթանկանա: Ղազինյանը նկատել է, որ 2021 թվականի ընտրություններից հետո իշխանությունները փոխել են իրենց վերաբերմունքը բիզնեսի նկատմամբ, իսկ 2026 թվականի ընտրություններից հետո իրավիճակն է՛լ ավելի կվատանա: