Երևանում նշվեց Հայրենիքի պաշտպանի օրը

Հայ և ռուս կոմպոզիտորների հայրենասիրական երգեր և սիրված քնարական ստեղծագործություններ հնչեցին Երևանում «Դոմ Մոսկվի» կենտրոնի բեմում՝ Հայրենիքի պաշտպանի օրվան նվիրված «Պահելով ընդհանուր սահմանները» համերգի ընթացքում։

Հյուրերի առջև ելույթ ունեցավ «Ռոմանովիչ բենդ» խումբը՝ հայտնի դաշնակահար և կոմպոզիտոր Մադաթ Ավանեսովի ղեկավարությամբ։ Հատկանշական է, որ հանդիսատեսը ակտիվորեն ձայնակցում էր արտիստներին, իսկ լեգենդար «Սպաներ» երգը ունկնդրեց հոտնկայս։

Տոնական միջոցառմանը ներկա էին Հայաստանում «Ռոսսոտրուդնիչեստվոյի» ներկայացուցչության ղեկավար Վադիմ Ֆեֆիլովը, ՀՀ-ում ՌԴ ԱԴԾ սահմանապահ վարչության, «Էրեբունի» ավիաբազայի և ռուսաստանյան կազմակերպությունների ներկայացուցիչներ։

Երեկոյի ավարտին Երևանում «Դոմ Մոսկվի» կենտրոնի տնօրեն Հայկ Մելիքյանին հանձնվեց Հայաստանում ՌԴ ԱԴԾ սահմանապահ վարչության ղեկավարության շնորհակալագիրը՝ «Հայրենիքի պաշտպանի օրվան նվիրված տոնական համերգը բարձր մակարդակով կազմակերպելու համար»։

Շնորհավորելով բոլոր զինծառայողներին նշանակալի տոնի կապակցությամբ, Հայկ Մելիքյանը նշեց. «Ավանդույթներին հավատարիմ մնալով՝ մենք ամեն տարի նշում ենք Հայրենիքի պաշտպանի օրը, որը խորհրդանշում է մեր նախորդ սերունդների հայրենասիրությունը, քաջությունը և հերոսությունը, որոնց շարքերում էին նաև հայ ժողովրդի փառահեղ որդիները։ Այս տոնը վեհ իմաստ է կրում՝ սիրել և պաշտպանել հայրենիքը։ Եվ այսօր ես ուզում եմ մաղթել մեզ բոլորիս խաղաղ երկինք և բարօրություն»։

Տոնական միջոցառումը կազմակերպել էին Մոսկվայի կառավարությունը, Մոսկվայի արտաքին տնտեսական և միջազգային հարաբերությունների վարչությունը, Մոսկվայի հայրենակիցների տունը և Երևանում «Դոմ Մոսկվի» կենտրոնը։