Լոնդոնը հայտարարել է Կիևին օգնության նոր փաթեթ հատկացնելու մասին

Մեծ Բրիտանիայի իշխանությունները հայտարարել են Ուկրաինային օգնության հերթական փաթեթը հատկացնելու մասին, որը ներառում է էներգացանցերի վերականգնման ֆինանսավորում, բրիտանացի զինվորական վիրաբույժների փորձի փոխանցում և ուղղաթիռների ուկրաինացի օդաչուների վերապատրաստում որպես հրահանգիչներ: «Արմենպրես»-ի փոխանցմամբ՝ այդ մասին ասվում է բրիտանական կառավարության կայքում հրապարակված հայտարարության մեջ։

Օգնության փաթեթը ներառում է լրացուցիչ 20 միլիոն ֆունտ ստեռլինգ (26,9 միլիոն դոլար) «էներգացանցերի վերականգնման և լրացուցիչ արտադրական հզորությունների ապահովման» համար։ Ընդգծվում է, որ Լոնդոնը չորս տարվա ընթացքում ավելի քան 490 միլիոն ֆունտ ստեռլինգ (661,3 միլիոն դոլար) է ծախսել Ուկրաինայի էներգետիկ ոլորտին աջակցելու համար։

Բացի այդ, 5,7 միլիոն ֆունտ ստեռլինգ (7,7 միլիոն դոլար) է հատկացվում ռազմաճակատի մոտ գտնվող համայնքների հումանիտար աջակցության համար։

Մեծ Բրիտանիայի իշխանությունները նաև հայտարարել են 70 անձից բաղկացած շտաբի ձևավորման մասին՝ Ուկրաինայի համար բազմազգ ուժերի ստեղծման շրջանակներում։

Հաղորդագրության մեջ նշվում է, որ Մեծ Բրիտանիայի վարչապետ Քիր Սթարմերը փետրվարի 24-ին կուղևորվի Փարիզ՝ մասնակցելու Ֆրանսիայի նախագահ Էմանուել Մակրոնի կողմից հրավիրված «կամեցողների կոալիցիայի» նիստին, իսկ արտաքին գործերի նախարար Իվետ Քուփերը «կհայտարարի Մեծ Բրիտանիայի կողմից Կիևին 30 միլիոն ֆունտ ստեռլինգ (40,5 միլիոն դոլար) հատկացնելու մասին՝ անդրդվելի ուկրաինական հասարակությանն աջակցելու և ՌԴ ենթադրյալ պատերազմական հանցագործությունների զոհերի և վերապրածների համար արդարադատության և հաշվետվողականության ջանքերը խթանելու համար»։