Փաշինյանն արևմտամետներին օգտագործում է ընդդիմության դեմ

Գործող իշխանությունները խիստ խուճապահար են ընդդիմության շարքերում տեղի ունեցած գործընթացներից, փորձում են մեթոդներ գտնել ընդդիմադիր առաջատար կուսակցություններին և դաշինքներին զրկել ընտրություններին մասնակցելու հնարավորությունից։

Ոգեշնչված լինելով, այսպես կոչված, «մոլդովական սցենարից»՝ փաշինյանական իշխանությունը իր գլխավոր հակառակորդներին նաև փորձում է ներքաշել անպտուղ բանավեճերի դաշտ, մեղադրանքներ կարել, իրեն հավատարիմ ԿԸՀ-ի ու դատաիրավական համակարգի միջոցով զրկել ընդդիմությանը ԱԺ ընտրություններին մասնակցելու հնարավորությունից։ Այս հարցում Քաղաքացիական պայմանագիր-ն, իհարկե, սեփական շարքերը չի օգտագործում, այլ հաստիքային արևմտամետներին, որոնք էլ զոնդաժ են անում հանրային կարծիքը, նաև իրենց վրա վերցնում ընդդիմությանը հարվածելու «առաքելությունը»։ Այս հարցում էլ հստակ դերաբաժանում է արված։

«Հանրապետություն» կուսակցության թիրախում գործարար, բարերար Սամվել Կարապետյանի «Մեր ձևով» շարժումն ու «Ուժեղ Հայաստան» կուսակցությունն են։ Արևմտամետ կուսակցության նախագահ Արամ Սարգսյանը գրեթե ամենօրյա պարբերականությամբ հարցազրույցներ է տալիս, պահանջում չգրանցել Սամվել Կարապետյանի թիմին։ «Չպետք է թույլ տալ, որ նրանք մասնակցեն ընտրություններին այնպես, ինչպես դա արվեց Մոլդովայում»,- ասել էր Սարգսյանը։

«Հանուն հանրապետության» կուսակցության նախագահ Արման Բաբաջանյանն էլ, մեր տեղեկություններով, դիմել է Գլխավոր դատախազությանը և Ազգային ժողովին՝ ՀՀ երկրորդ նախագահ Ռոբերտ Քոչարյանի մասնակցությունն առաջիկա խորհրդարանական ընտրություններին արգելելու պահանջով։ Իրեն արևմտամետ հռչակած այս սեգմենտը մշտապես հանդես է գալիս որպես Նիկոլ Փաշինյանի հարվածային ուժ, օգտագործվում ամենակեղտոտ հանձնարարություններում՝ թիրախավորելու ազգային ուժերին։ Դրա դիմաց երբեմն-երբեմն Փաշինյանը «թուլափայ» է նետում նրանց առջև։

Աննա Մարգարյան