Մատվիենկոն հայտարարել է Ադրբեջանի հետ համագործակցության նոր հնարավորությունների մասին

Ռուսաստանի և Ադրբեջանի միջև «Ադրբեջանական ավիաուղիներին» (AZAL) պատկանող ինքնաթիռի վթարի հետևանքների հետ կապված վերջնական կարգավորումը նոր հնարավորություններ է բացում ռուս-ադրբեջանական հարաբերությունների հետագա զարգացման համար։

Ինչպես «Արմենպրես»-ը տեղեկանում է «Ինտերֆաքս» գործակալությունից, այս մասին ապրիլի 15-ին հայտարարել է Ռուսաստանի Դաշնային ժողովի Դաշնության խորհրդի նախագահ Վալենտինա Մատվիենկոն Միլլի Մեջլիսի խոսնակ Սահիբա Գաֆարովայի հետ հանդիպման ժամանակ։«Մենք շատ ուրախ ենք, որ երեկ (ապրիլի 15-ին) մեր կառավարությունները վերջնական որոշում կայացրին՝ լուծելու ինքնաթիռի ողբերգական վթարի հետևանքները։

Մենք ավարտեցինք այս փուլը, և սա նոր հնարավորություններ է բացում ռուս-ադրբեջանական փոխշահավետ հարաբերությունների հետագա զարգացման համար», – ասել է Մատվիենկոն։

Նրա խոսքով՝ նման հարաբերությունները հսկայական ներուժ ունեն փոխշահավետ համագործակցության համար և զարգանում են զանազան ոլորտներում։

Մատվիենկոն գոհունակություն է հայտնել երկու երկրի միջև միջխորհրդարանական համագործակցության զարգացման կապակցությամբ։Մատվիենկոյի և Գաֆարովայի հանդիպումը տեղի է ունեցել Ստամբուլում՝ Միջխորհրդարանական միության 152-րդ վեհաժողովի շրջանակներում։

Ադրբեջանը և Ռուսաստանը համաձայնության են եկել 2024 թ. դեկտեմբերի 25-ին Ակտաուի մոտակայքում «Ադրբեջանական ավիաուղիներ» (AZAL) ընկերությանը պատկանող Embraer 190 ինքնաթիռի կործանման հետևանքների կարգավորման շուրջ, որը կներառի նաև Ռուսաստանի կողմից փոխհատուցման տրամադրում։Համաձայնությունը ձեռք է բերվել նախագահներ Վլադիմիր Պուտինի և Իլհամ Ալիևի միջև Դուշանբեում 2025 թ. հոկտեմբերին կայացած հանդիպման ժամանակ։