Մենք պետք է խնդիրները լուծենք տարածաշրջանի մեր գործընկերների հետ միասին․ Ադրբեջանի նախագահի օգնական

Ադրբեջանը տարածաշրջանային պատասխանատվության հայեցակարգի կողմնակից է, որը նախատեսում է տարածաշրջանային երկրների կողմից տարածաշրջանի ներսում առկա խնդիրների լուծում։ Անթալիայում ԱՊԱ-ի թղթակցի փոխանցմամբ՝ այս մասին Անթալիայի 5-րդ դիվանագիտական ​​ֆորումի շրջանակներում կազմակերպված նիստում հայտարարել է Ադրբեջանի նախագահի օգնական Հիքմեթ Հաջիևը։

Հաջիևը նշել է, որ գլոբալ անկայունության և համաշխարհային կարգի խաթարման համատեքստում միջազգային հարթակները կարևոր նշանակություն ունեն. «Նման հանդիպումները կարևոր են գլոբալ մարտահրավերների և խնդիրների համատեղ քննարկման համար»։

Նա ընդգծել է, որ Ադրբեջանի համար տարածաշրջանային պատասխանատվությունը նշանակում է տարածաշրջանային խնդիրների լուծում առանց արտաքին միջամտության, տարածաշրջանային երկրների անմիջական մասնակցությամբ. «Մենք կարծում ենք, որ պետք է ինքներս լուծենք խնդիրները՝ տարածաշրջանի մեր գործընկերների հետ միասին, և խուսափենք արտաքինից պարտադրված մոտեցումներից»։

Ալիևի օգնականը նաև նշել է, որ տարածաշրջանային պատասխանատվությունը ենթադրում է համատեղ պատասխանատվություն և առաջնորդություն. «Մենք կիսում ենք այս պատասխանատվությունը տարածաշրջանի բարեկամ և եղբայրական երկրների հետ և ընդլայնում ենք համագործակցությունը»։

Նրա խոսքով, դիվանագիտության և երկխոսության միջոցով Ադրբեջանը կառուցում է համագործակցություն ինչպես երկկողմ, այնպես էլ բազմակողմ ձևաչափերով։