«Իրենք տեսնում են, որ արդեն իրենց ճամպրուկները հավաքելու ժամանակն է»․ Նարեկ Կարապետյանը՝ ՔՊ-ին

«Մենք վստահ ենք, որ Սամվել Կարապետյանի ազատ արձակման պարագայում, երբ նա հնարավորություն կստանա շփվել իր հայրենակիցների հետ, Հայաստանում ավելի կուժգնանա մեծ փոփոխությունների ալիքը ու դրա արդյունքում մեր երկիրը վերջապես կհասնի փոփոխության։ Մենք արդեն հոգնել ենք այս աղքատության մեջ մեր երկիրը տեսնել։ Մենք արդեն հոգնել ենք, որ իշխանություններն այսօրվա պես ժամերով, անհարգալից արտահայտություններ են թույլ տալիս, որ ոչինչ չեն անում մարդկանց կյանքը բարելավելու, Հայաստանի ամեն քաղաքում մարդկանց կյանքը փոխելու համար։ Ութ տարվա ընթացքում միայն խոսքեր եւ վիրավորանքներ ենք տեսնում»,– ՀՀ հակակոռուպցիոն դատարանի մոտ, լրագրողների հետ զրույցում ասաց «Ուժեղ Հայաստան» կուսակցության նախընտրական ցուցակը գլխավորող Նարեկ Կարապետյանը։

Իր բնութագրմամբ՝ այն բառապաշարը, որն իշխանությունն օգտագործում է, շատ հատուկ է իրենց մտածելակերպին․ «Դա լեզվամտածողություն է, այն լեզվամտածողությունը, որ իրենք օգտագործում են, հատուկ է իրենց, իրենց ոճին։ Ինչ վերաբերվում է իրենց հաղթանակին կամ պարտությանը՝ իրենք տեսնում են, որ արդեն իրենց ճամպրուկները հավաքելու ժամանակ է։ Դա մասնագետների գնահատականն է, մենք միշտ վստահում ենք մասնագիտական կարծիքին, հարցումներին, մասնագետների գնահատականներին»։

Ի դեպ, նա ցույց տվեց ոստիկանության գվարդիայի մեքենաները, որոնք մի քանի օր է՝ կայանած են դատարանի բակում՝ ասելով. «Գիտե՞ք ինչն է հետաքրքիր, այս մեքենաները մենք ենք նվիրել պետությանը։ Մենք ենք այս մեքենաները արտադրել եւ նվիրել ենք մեր պետությանը, իսկ այսօր նրանք եկել են եւ սրանով բերել են բարերար Սամվել Կարապետյանին»։

Ինչ վերաբերվում է երեկ հրապարակված ձայնագրություններին, «Ուժեղ Հայաստանի» կողմից իբրեւ ընտրակաշառք բաժանելու «ապացույցներին», Նարեկ Կարապետյանն ասաց, որ դրանք որոշ դեպքերում մոնտաժված են, որոշ դեպքերում՝ սադրանք։ Չբացառեց, որ այս օրերին իշխանական տարբեր շրջանակների կազմակերպմամբ մարդիկ զանգահարեն, օգնություն խնդրեն եւ փորձեն այդ զրույցը ներկայացնել իբրեւ ընտրակաշառք։ Մասնավորեցրեց, օրինակ` Գոհար Ղումաշյանի զրույցը եղել է պատերազմի 104-ամյա վետերանի հետ, որին իրենք արդեն մի քանի տարի է՝ աջակցում են։

Մանրամասները՝ տեսանյութերում

«Սամվել վարչապետ», «Ազատություն Սամվել Կարապետյանին» վանկարկումներով՝ ցուցարարները «Երազ» այգուց քայլեցին մինչեւ Հակակոռուպցիոն դատարան, որտեղ ընթանում է «Ուժեղ Հայաստան» ուժի վարչապետի թեկնածու, տնային կալանքի տակ գտնվող Սամվել Կարապետյանի գործով նիստը։