Այս շաբաթ ես և իմ գործընկեր Աննա Կոստանյանը պաշտոնական այցով գտնվում էինք Բրյուսելում.Ավետիք Չալաբյան

Երբ մենք խոսում ենք Եվրամիության մասին, հաճախ ասոցացնում ենք այն Շարլ Միշելի կամ Ուրսուլա ֆոն դեր Լայնենի հետ՝ գործիչներ, որոնք փաստացի հովանավորում են Հայաստանում գործող բռնատիրական վարչախումբը, և որոնք նաև օժանդակեցին նրան Արցախի հանձնման ամոթալի գործում: Սակայն Եվրոպայում կան նաև այլ ուժեր, որոնք ընգծված ընդդիմության մեջ են գտնվում այս գծին, պարբերաբար իրենց ձայնն են բարձրացնում Հայաստանի և Արցախի օգտին, հաճախ են այցելում Հայաստան՝ տեղում իրավիճակին ծանոթանալու և վարչախմբի ներկայացրած կեղծիքները դիմակազերծելու նպատակով:

 

Այդպիսի ուժերից մեկը Բելգիայի խոշորագույն ընդդիմադիր «Ֆլամանդական շահ» կուսակցությունն է, որի պատվավոր նախագահ Գերոլֆ Աննեմանսի հրավերով մենք այցելեցինք Բրյուսել, և հանդիպեցինք «Եվրոպական հայրենասերներ»-ի անդամ մի շարք ազգային պատվիրակությունների հետ: Մասնավորապես, մենք հանդիպումներ ունեցանք ֆրանսիական պատվիրակության պատգամավոր Վիրջինիա Ժորոնի, իտալական պատվիրակության ղեկավար Պաոլո Բորչիայի, պորտուգալական պատվիրակության պատգամավոր Տիագո Մորեյրա դե Սայի, ու նաև բելգիական պատվիրակության ընդլայնված կազմի հետ։ Մեզ ընդունեց նաև «Ֆլամանդական շահ» կուսակցության գործող նախագահ Թոմ վան Գրիկենը։

 

Այս հանդիպումների ընթացքում մենք քննարկել ենք հարցերի բավական լայն սպեկտր՝ մասնավորապես ԵՄ-ի և Հայաստանի երկարաժամկետ համագործակցության հնարավորությունները, հարավկովկասյան տարածաշրջանում ԵՄ դերակատարությունը, այլ ուժային կենտրոնների հետ բալանսավորված հարաբերություններ պահպանելու անհրաժեշտությունը, Արցախի հայ բնակչության վերադարձի իրավունքը և ԵՄ քաղաքական դերակատարությունն այս հարցում, Հայոց ցեղասպանության միջազգային ճանաչման ակտիվացումը, Հայաստանում իրական ժողովրդավարական բարեփոխումներ իրականացնելու անհրաժեշտությունը, Հայ Առաքելական Սուրբ եկեղեցու դեմ վարչախմբի իրականացված ամոթալի արշավը, և այլն:

 

Բազմաթիվ հարցերում մենք տեսել ենք հայացքների զգալի ընդհանրություն, որը լավ հիմք է տալիս մեր հետագա համագործակցության համար: Մենք հետևողականորեն շարունակելու ենք այս աշխատանքը՝ ընդարձակելու Հայաստանի արտաքին քաղաքական կապերի աշխարհագրությունը և մեր բարեկամների ու գործընկերների շրջանակը, մինչ այդ կիսվում եմ այս այցից մի շարք հիշարժան պահերով: