Ամենամեծ փորձն ունենք տնտեսության մեջ և դա վստահություն է տալիս մեր հայրենակիցներին. Նարեկ Կարապետյան

«Ովքեր քննադատում են աղքատության հաղթահարման մեր ծրագիրը, մի բան ասեմ՝ իրենք պատրա՞ստ են 10 օր,  20 օր, մեկ ամիս ապրել այն մարդկանց կյանքի պայմաններում, ովքեր ստանալու են այս աջակցությունը»,- լրագրողների հետ հանդիպմանն ասաց  «Ուժեղ Հայաստան» կուսակցության խորհրդի անդամ Նարեկ Կարապետյանը։

Նա նշեց, որ կա աղքատության թակարդ ու մարդկանց պետք է հանեն այդ թակարդից, հնարավորություն,  միջոցներ տան ոտքի կանգնեն,  իսկ արդեն մի քանի տարի հետո այդ ընտանիքների երեխաները կրթություն կստանան և իրենք կհանեն իրենց ընտանիքներն աղքատությունից։

«Այսքան հնարավորություններով տեր հայրենակիցներ ունեցող ազգը չպետք է թույլ տա իր տասնյակ հազարավոր հայրենակիցներին 21-րդ դարում ոչ վայել աղքատության մեջ լինեն»,- ասաց նա։

Խոսելով տնտեսության թռիչքաձև աճի մասին՝ Նարեկ Կարապետանն ասաց, որ երեք հիմնական ուղղություն կա՝ ներդրումների աջակցում և ներդրողների հետ երկարաժամկետ պայմանագրերի կնքում, ներքին շուկայի աջակցում և գործարարների շահերի պաշտպանություն, պետական ծրագրային մասնակցություններ։

«Տնտեսությունը մեր մասնագիտությունն է։ Մենք կարող ենք ասել՝ ամենամեծ փորձն ունենք տնտեսության մեջ և դա վստահություն է տալիս մեր հայրենակիցներին, որ վերջապես մենք ենք իրականացնելու տնտեսական փոփոխությունների ծրագիրը, որը պետք է 10 տարի, 5 տարի առաջ լիներ, ոչ թե այսօր, բայց ստիպված ենք անել այսօր»։