ԵՄ-ից միլիոնավոր եվրոներ ստացող մարդիկ աղաղակում են ՌԴ-ից 70 միլիոն ռուբլու ներկրման մասին․ Բադալյան

Մի քանի օր առաջ տեղեկություն տարածվեց, թե օդանավակայանում հայտնաբերվել է Հայաստան ռուսական ռուբլու չհայտարարգրված ներկրման դեպք՝ մոտ 70 միլիոն ռուբլի, կանխիկ:

«Ի՞նչ տեղի ունեցավ հետո: Այս դեպքը «որսացին» այսպես ասած քաղաքացիա-փորձագիտական շրջանակներ, ու սկսեցին տարածել իբրեւ վկայություն, թե Հայաստանում ընդդիմադիր ուժերը փող են բերում Ռուսաստանից, որ բաժանեն ընտրակաշառք:  Ինչն է այստեղ զավեշտալի: Զավեշտալի է այն, որ Եվրամիությունից տարբեր դրամաշնորհային ծրագրերով առատորեն՝ տարեկան միլիոնավոր եվրոներ ֆինանսավորում ստացող մարդիկ, աղաղակում են Ռուսաստանից 70 միլիոն ռուբլու կանխիկ ներկրման հարցում, դա ներկայացնելով իբրեւ ընդդիմության ընտրակաշառքի «ողջամիտ կասկած»: Այն դեպքում, երբ 70 միլիոն ռուբլին անգամ 1 միլիոն եվրո չի կազմում»,-ի պատասխան ՊԵԿ հայտարարությանը հետևած մեկնաբանությունների՝ նշում է քաղաքական վերլուծաբան Հակոբ Բադալյանը:

Նա նշում է՝ այդպիսով, Եվրամիությունից տարեկան միլիոնավոր եվրոներ ստացող մարդիկ աղաղակում են Ռուսաստանից 1 միլիոն եվրոյից էլ պակաս ռուբլու ներկրման դեպքի առիթով:

«Այն էլ, երբ չկա բացարձակապես որեւէ փաստ ու փաստարկ, ապացույց, որ այդ փողը բերել է ընդդիմությունը, որպեսզի բաժանի ընտրակաշառք: Չկա այդ փողի եւ ընդդիմության կապի ոչ մի փաստարկ անգամ, ես էլ չեմ ասում՝ փաստ:

Ավելին, հայտնի է, որ Ռուսաստանի հանդեպ պատժամիջոցների պատճառով շատ բարդացել է Ռուսաստանից բանկային փոխանցումների հնարավորությունը: Նաեւ Մոսկվան է ներսում շատ խստացրել ֆինանսական շարժերը, բարձրացրել դրանց առնչությամբ միջնորդավճարները կամ հարկերը: Եվ դրա բերումով, Ռուսաստանում աշխատող, բիզնես անող շատ շատերը կանգնում են փոխանցումային բարդությունների առաջ եւ դրանից խուսափելու համար կարող են դիմել ռուբլին պարզապես կանխիկ բերելու տարբերակին: Ընդ որում, եթե հայտարարագրեն, չի լինի ոչ մի խնդիր: Խնդիր կարող է լինել չհայտարարագրելու դեպքում:

Բայց ահա, կոնկրետ մի դեպք, խիստ հազվադեպ, եւ դրա վերաբերյալ այսպիսի քարոզչական արշավ ընդդիմության դեմ, առանց որեւէ հիմնավորման ու փաստական հիմքի: Եվ այդ արշավը իրականացնում են մարդիկ, որոնք բացահայտորեն ֆինանսավորվում են Եվրամիության ծրագրերով:

Հիշեցնեմ այս առնչությամբ Բագրատ Սրբազանի տավուշյան ակցիաների օրերին այդպիսի շրջանակներից մեկից տարածված սուտ տեղեկությունը, թե Տավուշի փոխանակման կետերում այդ օրերին մեծ քանակությամբ ռուսական ռուբլի է փոխանակվել: Այս կեղծ տեղեկությունը տարածվում էր Բագրատ Սրբազանի նախաձեռնությունը իբրեւ ռուսական ներկայացնելու եւ վարկաբեկելու համար: Հետո, հասարակական գործիչներից մեկը՝ ներկայումս «Բոլորին դեմ եմ» կուսակցության մեջ ներգրավված Միքայել Նահապետյանը պետական տվյալների վրա հիմնված հստակ փաստերով բացահայտել էր այդ կեղծիքը»,-գրում է նա։