Պենտագոնը Իրանի ափերի մոտ ռազմանավերի մեծ խումբ է պահպանում

ԱՄՆ ռազմածովային ուժերի՝ շուրջ 25 մարտական նավերից բաղկացած խմբավորումը շարունակում է գտնվել Իրանի ափերի մոտ, հետևում է ԱՄՆ Ռազմածովային ինստիտուտի տեղեկատվական ծառայության տվյալներից։

Ներկայումս Արաբական ծովում՝ Իրանի ափերից հարավ-արևելք, մարտական հերթապահություն են իրականացնում երկու ավիակիր՝ USS Abraham Lincoln-ը և USS George H.W. Bush-ը։ Դրանց վրա տեղակայված են ընդհանուր առմամբ ավելի քան 100 կործանիչ, ռադիոէլեկտրոնային պայքարի և հեռահար ռադիոլոկացիոն նախազգուշացման ինքնաթիռներ։

Ավիակիրների հետ միասին տարածաշրջանում, այդ թվում՝ Օմանի ծոցում՝ Հորմուզի նեղուցից արևելք, տեղակայված են 14 հրթիռային էսմինեց, երկու առափնյա գոտու մարտական նավ և երեք ականորսիչ։

Օմանի ծոցում գտնվում է նաև ամֆիբիական դեսանտային խումբ՝ երեք խոշոր դեսանտային նավերից կազմված, որոնց վրա գտնվում է ծովային հետևակի էքսպեդիցիոն գումարտակ։

Բացի մարտական պարեկությունից, նավերը ներգրավված են նաև իրանական նավահանգիստների ծովային շրջափակման ռեժիմի ապահովման գործում։

Բացի այդ, այս պահին երկու ամերիկյան հրթիռային էսմինեց մարտական հերթապահություն են իրականացնում Կարմիր ծովում՝ Սաուդյան Արաբիայի ափերի մոտ։

Պենտագոնի ղեկավար Փիթ Հեգսեթը անցած ուրբաթ, Սինգապուրում «Շանգրի-Լա երկխոսություն» միջազգային անվտանգության ֆորումում ելույթ ունենալիս, հայտարարել է, որ ԱՄՆ զինված ուժերը պատրաստ են վերսկսել հարվածները Իրանի դեմ, եթե Թեհրանի միջուկային ծրագրի շուրջ բանակցությունները տապալվեն։