Հայերին դեռ երբեք սենց չէին խաբել. Արթուր Ղազինյան

Իրավաբանական գիտությունների թեկնածու, ՀՀ Ազգային ժողովի նախկին պատգամավոր Արթուր Ղազինյանը գրում է.

«Հայերին դեռ երբեք սենց չէին խաբել։

Շատերս զարմացել ենք, թե ինչպես կարող էր ՔՊ այսքան մեծ թվով ձայներ ստանալ, ինչի՞ համար են մարդիկ քվեարկել այս քաղաքական ուժին:

Ներկայացնեմ չորս հիմնարար նշանակություն ու մեծ ազդեցություն ունեցած գործոններ.

ՎԱՐՉԱԿԱՆ ՌԵՍՈւՐՍ

Այս ընտրություններում ՀՀ պետական և ՏԻՄ մարմինների աշխատակիցների` աշխատանքից ազատման սպառնալիքի տակ, ընտրական գործընթացներին աննախադեպ մասշաբով միջամտություն: Այս մեխանիզմով իշխող ՔՊ կուսակցությունը իր քաղաքական շահերի համար օգտագործել է ՀՀ Զինված ուժերը, իրավապահ ամբողջ համակարգը, հանրապետական գործադիր մարմիններն ու ՏԻՄ ենթակայության ներքո գործող կրթական և առողջապահական հաստատությունները:
Մամուլում բազմաթիվ են դրանց մասին հրապարակումները:

Այս մեխանիզմը իշխող ՔՊ-ին տվել է լրացուցիչ առնվազն 100.000 ձայն:

ԸՆՏՐԱԿԱՇԱՌՔ

Իշխանությունը` ՀՀ պետական բյուջեի միջոցների հաշվին բաժանել է լայնածավալ ընտրակաշառք. թոշակների 10.000 դրամ բարձրացում, հարհյուրավոր միլինների պարգևավճարներ և այլ դրամական խրախուսման միջոցներ: Առանձնահատուկ ուշադրության է արժանի ընտրություններին ընդառաջ թոշակները բարձրացնելու ՀՀ Կառավարության որոշումը: Սա հատկապես կարևոր է այն իմաստով, որ 2026թ. Պետական բյուջեի մասին ՀՀ օրենքով այդպիսի բարձրացում չի նախատեսվել, ինչը նշանակում է, որ թոշակները բարձրացնելու ՀՀ Կառավարության որոշումն ունեցել բացառապես նախընտրական քաղաքական նշանակություն: Թոշակների այս բարձրացումը բազմիցս շահարկվել իշխող ՔՊ-կողմից նախընտրական քարոզարշավի ընթացքում` ներկայացվելով որպես իրենց բարի կամքի ու թոշակառուների նկատմամբ հոգատարության դրսևորում:

Հաշվի առնելով այն հանգամանքը, որ թոշակառուները հանդիսանում են սոցիալապես խոցելի խավ, ընտրություններից առաջ նրանց ձայները «գնելու» ՔՊ որոշումը լուրջ խնդիրներ ունի բարոյականության հետ:

Այս մեխանիզմով իշխող ՔՊ կուսակցությունը ապահովել է լրացուցիչ առնվազն 200.000 ձայն` 600.000 թոշակառուների ընդհանուր թվից:

ԱՌՈՂՋԱՊԱՀՈւԹՅԱՆ ԱՊԱՀՈՎԱԳՐՈւԹՅՈւՆ

Հունվարի 1-ից ուժի մեջ մտած Առողջության համընդհանուր ապահովագրության մասին ՀՀ օրենքի գործարկումը փաստացի նախընտրական մեծ դիվիդենտներ բերեց իշխող քաղաքական ուժին, իսկ այն փաստը, որ դա արվեց ընտրություններից մի քանի ամիս առաջ` առանց այդ համակարգի ներդրման երկարաժամկետ ֆինանսական և ինստիտուցիոնալ ամրապնդման, փաստում է այն մասին, որ դա ուներ բառապես քաղաքական նպատակ` ընտրություններից առաջ ՀՀ պետական բյուջեի միջոցների հաշվին «գնել» լրացուցիչ ձայներ: Առողջության ապահովագրման այս մեխանիզմը լայնորեն օգտագործվեց իշխող քաղաքական ուժի կողմից` նախընտրական քարոզարշավի ընթացքում, իսկ մեծ թվով ՀՀ քաղաքացիներ հրապարակային շնորհակալություն էին հայտնում Նիկոլ Փաշինյանին իրենց առողջական խնդիրներն անվճար լուծելու համար:

Այս համակարգի շահառու են դարձել 1.7 միլիոն ՀՀ քաղաքացի, իսկ թե քանի ՀՀ քաղաքացի է փաստացի օգտվել այս համակարգից, առայժմ հայտնի չէ: Սակայն պարզ է, դրանց թիվը հասնում է հարյուր հազարների:

ԵՎՐՈՊԱԿԱՆ ԱՊԱԳԱ

Վերջին ամիսների ընթացքում իշխող ՔՊ կուսակցությունը հանրության շրջանում գեներացնում էր հակառուսական լայնամասշտաբ տրամադրություններ և հանրությանը ներկայանում էր որպես Հայաստանը Եվրոպա տանող քաղաքական ուժ: Ռուսաստանում այս քաղաքականությունն ընդունեցին շատ «սուր» և Հայաստանի տնտեսվարողների նկատմամբ կիրառեցին լայնածավալ առևտրսյին սահմանափակումներ, ինչի հետևանքով տնտեսական և ֆինանսական մեծ կորուստներ ունեցան հարյուրավոր տնտեսվարողներ:
Հակառուսական դիմակ հագած Փաշինյանը անմիջապես իր վրա վերցրեց Հայաստանը Եվրոպա տանելու նավի ղեկը` շատ լավ իմանալով, որ այդ նավը երբեք Եվրոպա չի հասնելու և լավագույն դեպքում կանգնելու է Նովորոսիսկի, իսկ վատագույն դեպքում` Ստամբուլի նավահանգիսներից մեկում:

Հայաստանը եվրոպական ընտանիքում տեսնել երազող հարյուր հազարավոր մեր քաղաքացիներ ի դեմս Նիկոլ Փաշինյանի, տեսան իրենց երազանքի իրագործան գործակալի, հավատացին նրա հակառուս և եվրոպամետ տեսակին ու իրենց ձայները տվեցին նրան:

Ընտրությունների գիշերը Փաշինյանը զրոյացրեց հայ «եվրոսիրահարների» հույսերը` հայտարարելով, որ Հայաստանը պատրաստ չէ Եվրոպա գնալ: Նա հանեց իր «հակառուսի» դիմակը և շուտով կհագնի «ռսաստրուկի» դիմակն ու կմեկնի Մոսկվա` իր հավերժ հավատարմությունն ու նվիրավածությունը ցուցադրելու համար: (ԱՊՀ դիտորդներն արդեն ճանաչեցին ընտրությունները):

Իսկ Մոսկվան ստացավ իր «սրտի» վարչապետին . . .

«Եվրոսիրահարներն» այլևս կարևոր չեն, նրանց ձայներն արդեն գողացել են և նրանց կարելի է ուղղակի մոռանալ` մինչև մյուս ընտրություններ:

Հետո էլի կխաբի ու այդպես շարունակ . . .

Հ.Գ. Ընտրական խախտումների, ընդդիմադիր ուժերի գործունեությունը պարալիզացնող կալանքների, ընդդիմության հիմնական առաջնորդին կալանքի տակ պահելու, քվեաթերթիկների հաշվարկը խիստ տարօրինակ կերպով ձգելու և ուշացնելու, քվեաթերթիկների 10%-ի հաշվարկի հիմքով ՔՊ-ի կողմից իրեն հաղթող հռչակելու, զինվորների տեղամասերում կուտակումների, ՀՀ Ընտրական օրենսգրքի ընտրություններից 2 ամիս առաջ փոխելու և այլ կեղծիքների, խախտումների և ապօրինությունների ազդեցությունը ընտրությունների արդյունքների վրա ենթակա է առանձին, շատ խորը և համալիր ուսումնասիրության»: