ԱՄՆ-ն ակնկալում է, որ Իրանի հետ բանակցությունները կշարունակվեն հունիսի 22-ի գիշերը

Ամերիկյան պատվիրակությունն ակնկալում է, որ Շվեյցարիայում ԱՄՆ-ի և Իրանի մասնակցությամբ քառակողմ բանակցությունները կընթանան հունիսի 22-ի գիշերվա ընթացքում։ Այս մասին ԱՄՆ փոխնախագահ Ջեյ Դի Վենսի լրագրողների խմբին հայտնել է ամերիկյան պաշտոնյան, հաղորդում է ՏԱՍՍ-ը:

«Բանակցությունները դեռ ընթանում են, և մենք ակնկալում ենք, որ դրանք կշարունակվեն գիշերվա ընթացքում», - հայտնել է ամերիկացի պաշտոնյան լրագրողներին, որոնք ուղեկցում են Վենսին Բյուրգենշտոկ կատարած այցի ժամանակ։

Լրագրողները մեջբերել են նաև ամերիկացի դիվանագետի հայտարարությունը։ Նրա խոսքով՝ ի հակառակ լայնորեն տարածված կեղծ հաղորդագրությունների՝ իրանցիները դեռ այստեղ են, և բանակցությունները շարունակվում են։

«Մենք նախատեսում ենք աշխատել գիշերվա ընթացքում», - հավելել է նա։

Դիվանագետը նշել է, որ բանակցություններում պարզաբանել են Իրանի կողմից նեղուցի վերաբերյալ որոշ մոլորեցնող ազդանշաններ։ Բացի այդ, նրա խոսքով, խորհրդակցությունների ընթացքում խոսվել է հակամարտությունների կանխարգելման մեխանիզմների մասին, որոնք կոչված են ապահովելու, որ նեղուցը մնա լիովին բաց նավագնացության համար։

Դիվանագետի խոսքով՝ քննարկվել է նաև Հարավային Լիբանանում հրադադարի պահպանման ապահովումը։ Դիվանագետը նշել է, որ կայացած խորհրդակցությունները ելակետ կդառնան հետագայում տեխնիկական խմբերի բանակցությունների համար։

Ինչպես ավելի վաղ հաղորդել էր Tasnim գործակալությունը՝ հղում անելով աղբյուրին, Իրանի պատվիրակությունը որոշում է կայացրել չշարունակել քառակողմ բանակցությունները շվեյցարական Բյուրգենշտոկում՝ ԱՄՆ նախագահ Դոնալդ Թրամփի հայտարարություններից հետո։ Վերջինս հունիսի 21-ին սպառնացել էր նոր հարվածներ հասցնել Իսլամական հանրապետությանը՝ Լիբանանում ստեղծված իրավիճակի պատճառով։