Վարդան Ջհանյանը գործակցության հուշագիր է ստորագրել European Metals-ի հետ

Հայաստանի հանքարդյունաբերության և մետալուրգիայի ասոցիացիայի նախագահ Վարդան Ջհանյանը և ասոցիացիայի ներկայացուցիչ Լուսինե Մանուչարյանը մասնակցել են European Metals Annual Conference (Եվրոպական մետաղների ամենամյա համաժողով) 2026 -ին։ Այն մեկնարկել է ոլորտային բարձր մակարդակի անդրադարձներով։ Օրակարգի առանցքային թեման նպատակներից իրագործում տանող ճանապարհն է:

Ելույթներով հանդես են եկել Եվրոպական հանձնաժողովի Ֆինանսական կայունության, ֆինանսական ծառայությունների և կապիտալի շուկաների միության գլխավոր տնօրեն Պաուլինա Դեյմեկ Հաքը, Եվրախորհրդարանի պատգամավոր Ռադան Կանևը։

Համաժողովը նպատակ ունի մեկտեղել եվրոպական կառույցների և արդյունաբերության առաջատար ներկայացուցիչների ձայները՝ Եվրոպայի մետաղների ոլորտի ապագայի և դրա արդյունաբերական մրցունակության շուրջ արդիական ու հեռանկարային քննարկում անցկացնելու համար:

ՀՀՄԱ նախագահ Վարդան Ջհանյանը գործակցության հուշագիր է ստորագրել Eurometaux-ի (Եվրոպական մետաղների ասոցիացիա) գլխավոր տնօրեն Ջեյմս Ուոթսոնի հետ՝ կարևորելով համատեղ աշխատանքը միջազգային ասպարեզում։

Պաուլինա Դեյմեկ Հաքը հստակ գործողությունների կոչով սահմանել է հանդիպման հիմնական թիրախը։

«Մենք պետք է արժեքավոր ռեսուրսները պահենք Եվրոպայում: Սրան հասնելը հեշտ չի լինի, բայց մենք պետք է շարունակենք երկխոսությունը»,- նշել է նա:

ԵԽ պատգամավոր Ռադան Կանևն ընդգծել է խոսքից գործի անցնելու հրատապությունը։

«Հուսով եմ՝ սա կլինի այն աշունը, երբ գործերը կսկսեն շարժվել տեղից, քանի որ 2030 թվականին արդեն շատ ուշ կլինի: Մենք պետք է ամեն կերպ առաջ տանենք հիմա գործելու գաղափարը, որպեսզի հաջորդ տարի կարողանանք իրական արդյունքներ ցույց տալ»,- հայտարարել է նա:

Դրան հաջորդել է սպասված «զրույց բուխարու մոտ» (fireside chat) ձևաչափով քննարկումը European Metals-ի նախագահ և Metlen Group-ի գործադիր տնօրեն Էվանգելոս Միտիլինեոսի հետ, որը կիսել է իր տեսակետն այն մասին, թե ինչպես են ԵՄ վերջին նախաձեռնությունները ձևավորում գունավոր մետաղների ոլորտը:

Էվանգելոս Միտիլինեոսը կոչ է արել ավելի մեծ միասնություն ցուցաբերել արդյունաբերության և ԵՄ կառույցների միջև։

«Արդյունաբերությունը պետք է հստակ հասկացնի ԵՄ կառույցներին, որ մենք մեկ միասնություն ենք. մենք պետք է աշխատենք միասին: Մենք ունենք նույն շահերը և նստած ենք սեղանի նույն կողմում»,- ասել է նա:

Եվրոպան շարունակում է կառուցել դիմացկուն մատակարարման շղթաներ և զարգացնել ռազմավարական տեխնոլոգիաներ։ Մետաղների և կիսահաղորդիչների էկոհամակարգի միջև գործակցությունը երբեք այսքան կարևոր չի եղել: Համաժողովը կնպաստի միջազգային փորձի ներդրմանը և գործընկեր անդամների հետ համատեղ աշխատելուն: