ՌԴ դեսպանը կանչվել է Ադրբեջանի ԱԳՆ. Բաքուն Մոսկվային նոտա է հանձնել

Այսօր Ադրբեջանում Ռուսաստանի արտակարգ և լիազոր դեսպան Միխայիլ Եվդոկիմովը կանչվել է արտաքին գործերի նախարարություն։ Այս մասին հայտնում են ադրբեջանական ԶԼՄ-ները:

Հանդիպման ընթացքում խիստ բողոք է արտահայտվել այն կապակցությամբ, որ հուլիսի 5-ի երեկոյան Ուկրաինայի Նիկոլաևի մարզում տեղակայված SOCAR-ի բենզալցակայանը ենթարկվել է անօդաչու թռչող սարքի հարձակման, և ռուսական կողմին հանձնվել է համապատասխան նոտա։

Հանդիպմանը հիշեցվել է, որ նշված անօդաչուի հարձակումը առաջին դեպքը չէ. ավելի վաղ Ուկրաինայում SOCAR-ի օբյեկտները, այդ թվում՝ գազաբաշխիչ կոմպրեսորային կայանը և Օդեսայի նավթաբազան, նույնպես ենթարկվել են ռազմական հարվածների և ռազմական գործողությունների այլ կործանարար հետևանքների, ինչի արդյունքում պատճառվել է զգալի նյութական վնաս, իսկ ընկերության աշխատակիցների շրջանում եղել են վիրավորներ։

Հայտարարվել է, որ, չնայած բազմակի նախազգուշացումներին, նման դեպքերի շարունակությունը վկայում է հարձակումների նպատակաուղղված բնույթի մասին։

Հանդիպմանը ուշադրություն է հրավիրվել նաև մի քանի ավիահարվածների վրա, որոնց արդյունքում վնասվել են Կիևում Ադրբեջանի դեսպանատան և Խարկով քաղաքում պատվո հյուպատոսության շենքերը։ Ընդգծվել է Վիեննայի կոնվենցիաներին համապատասխան դիվանագիտական և հյուպատոսական ներկայացուցչությունների շենքերի պաշտպանության պարտավորությունների խիստ պահպանման կարևորությունը։

Ռուսական կողմին կոչ է արվել համակողմանի հետաքննություն անցկացնել նշված բոլոր փաստերի վերաբերյալ, համապատասխան պարզաբանումներ տալ տեղի ունեցած դեպքերի վերաբերյալ, ինչպես նաև պահպանել քաղաքացիական օբյեկտների և դիվանագիտական ներկայացուցչությունների պաշտպանության վերաբերյալ միջազգային պարտավորությունները։