Ավետիք Չալաբյանի գործը՝ ԵՄ-ի ընդհանրական պատասխանների և քաղաքական լռության համատեքստում

Հունիսի վերջին « ՀայաՔվե»-ի գործընկեր` Եվրոպական խորհրդարանի «Հայրենասերները Եվրոպայի համար» (Patriots for Europe) խմբակցության պատգամավոր Գերոլֆ Աննեմանսը, Եվրոպական հանձնաժողովի նախագահ Ուրսուլա ֆոն դեր Լայենի այցից առաջ, առաջնահերթ կարգով հարցում էր ուղարկել Եվրոպական հանձնաժողովին` Ավետիք Չալաբյանի նկատմամաբ իրականացվող քաղաքական հետապնդումների վերաբերյալ գնահատական տալու: Եվրապատգամավորը հանձնաժողովին երկու շատ կոնկրետ հարց էր ուղղել.

արդյո՞ք Ավետիք Չալաբյանի ձերբակալության հարցը քննարկվելու էր Եվրոպական հանձնաժողովի նախագահ Ուրսուլա ֆոն դեր Լայենի՝ 2026 թվականի հուլիսին Հայաստան կատարվելիք այցի ընթացքում, և ինչպե՞ս է Եվրոպական հանձնաժողովը գնահատում Ավետիք Չալաբյանի գործը՝ Հայաստանի Հանրապետության կողմից ժողովրդավարության, հիմնարար ազատությունների և իրավունքի գերակայության ոլորտներում ստանձնած պարտավորությունների համատեքստում։

Երկու շաբաթ առաջ պարոն Աննեմանսը, Եվրոպական հանձնաժողովի կողմից` հանձնակատար Մարտա Կոսի անունից ստացել է «ԱՆԱՐՁԱԳԱՆՔ» արձագանք, որն ըստ էության խուսափողական պատասխան է և բնականաբար չի պարունակում հստակ բարձրացված հարցերին առարկայական մոտեցում։

Ինչպես միշտ ստանդարտ և ընդհանրական բնույթի ձևակերպումներ

- Եվրամիություն-Հայաստան հարաբերությունների,

- ժողովրդավարական բարեփոխումների,

- իրավունքի գերակայության և

- մարդու իրավունքների վերաբերյալ։

Զրո անդրադարձ Ավետիք Չալաբյանի գործին, նրա նկատմամբ իրականացվող քրեական հետապնդման քաղաքական շարժառիթների վերաբերյալ բարձրացված մտահոգություններին, ինչպես նաև վերջինիս նկատմամբ կիրառված կալանքի իրավաչափությանը։ Փաստացի Եվրոպական միության բարձր պաշտոնյաները խուսափում են պատասխանել նույնիսկ իրենց իսկ ներկայացուցչական մարմնի բարձրաստիճան պաշտոնյային:

Մարդու իրավունքների, ժողովրդավարության և իրավունքի գերակայության վերաբերյալ հռչակված արժեքները չեն կարող կիրառվել սելեկտիվ կերպով։ Եվրոպական միությունը պարտավոր է իր իսկ ջատագոված չափանիշներով գնահատել նաև քաղաքական դրդապատճառներով հետապնդումների, արդար դատաքննության երաշխիքների խախտման և ընդդիմադիր գործիչների նկատմամբ անհամաչափ սահմանափակումների վերաբերյալ փաստահեն մտահոգությունները։

«ՀայաՔվե»-ն արձանագրում է` երբ հասցեական հարցերին տրվում են ընդհանրական և վերացական պատասխաններ, սկզբունքային դիրքորոշումներն անխուսափելիորեն փոխարինում են քաղաքական նպատակահարմարությանը։ Նման մոտեցումը վարկաբեկում է ժողովրդավարական արժեքների պաշտպանության հեղինակությունը և խաթարում դրանց նկատմամբ հանրային վստահության ամրապնդումը։

Ավետիք Չալաբյանի գործը պահանջում է հստակ ԻՐԱՎԱՔԱՂԱՔԱԿԱՆ ԳՆԱՀԱՏԱԿԱՆ։
Ժողովրդավարության, մարդու իրավունքների և իրավունքի գերակայության պաշտպանությունը չափվում է պատրաստակամությամբ, որով վերոնշյալ սկզբունքները պաշտպանվում են նաև քաղաքականապես զգայուն և անհարմար դեպքերում։

«Հայաքվե» ազգային քաղաքացիական միավորումը շարունակելու է միջազգային գործընկերների ուշադրությունը հրավիրել Հայաստանում քաղաքական հետապնդումների, իրավունքի գերակայության խնդիրների և մարդու հիմնարար իրավունքների պաշտպանության հետ կապված մտահոգիչ զարգացումների վրա՝ ակնկալելով համարձակ, սկզբունքային և իրապես արժեքահեն արձագանքներ։