Ավետիք Չալաբյանի գործը՝ միջազգային ուշադրության կենտրոնում․ «Հայաքվեն» դիմել է եվրոպացի պաշտոնյաներին

«Հայաքվե» ազգային քաղաքացիական միավորումը շարունակում է միջազգային գործընկերներին տեղեկացնել Հայաստանում ժողովրդավարության, իրավունքի գերակայության և քաղաքական հետապնդումների վերաբերյալ մտահոգիչ զարգացումների մասին։

Ավետիք Չալաբյանի պաշտպանական խմբի կողմից հրապարակված՝ նրա նկատմամբ իրականացվող քաղաքականապես մոտիվացված և ապօրինի քրեական հետապնդման վերաբերյալ հայտարարությունը վերջին օրերին ուղարկվել է միջազգային տասնյակ կազմակերպությունների, իրավապաշտպան կառույցների, լրատվամիջոցների և հարյուրավոր եվրոպացի պաշտոնյաների։

Մասնավորապես.

Եվրոպական խորհրդարանի նախագահ Ռոբերտա Մեցոլային և նրա աշխատակազմին,

Եվրոպական խորհրդարանի «Եվրոպական ժողովրդական կուսակցություն» (EPP) խմբակցությանը և նրա ավելի քան 100 եվրապատգամավորներին,

Եվրոպական խորհրդարանի «Սոցիալիստների և դեմոկրատների առաջադիմական դաշինք» (S&D) խմբակցությանը՝ իր 136 եվրապատգամավորներով,

«Հայրենասերները Եվրոպայի համար» (Patriots for Europe) խմբակցությանը՝ Եվրոպական խորհրդարանի երրորդ խոշորագույն քաղաքական խմբին, ինչպես նաև դրա 86 եվրապատգամավորներին` ներառյալ «Հայաքվե»-ի անմիջական գործընկերները,

Եվրոպական խորհրդարանի գլխավոր քարտուղար Ալեսանդրո Կիոկետիին,

Եվրոպական խորհրդարանի Տարածաշրջանների գլխավոր տնօրինության «Եվրոպա. Արևելյան գործընկերություն և Ռուսաստան» բաժնի ղեկավար Ալեն Կրեսպինեին,

Եվրոպական խորհրդի նախագահ Անտոնիու Կոշտային և նրա աշխատակազմին,

Եվրոպայի խորհրդի խորհրդարանական վեհաժողովի նախագահ Պետրա Բայրին,

Եվրոպական հանձնաժողովի նախագահ Ուրսուլա ֆոն դեր Լայենին,

Եվրոպական հանձնաժողովի տեխնոլոգիական ինքնիշխանության, անվտանգության և ժողովրդավարության հարցերով գործադիր փոխնախագահ Հեննա Վիրկունենին,

Եվրոպական հանձնաժողովի փոխնախագահ, արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասին,

Եվրոպական հանձնաժողովի ընդլայնման հարցերով հանձնակատար Մարտա Կոսին,

Եվրոպական հանձնաժողովի միջազգային գործընկերությունների հարցերով հանձնակատար Յոզեֆ Սիկելային,

Եվրոպական հանձնաժողովի ժողովրդավարության, արդարադատության, իրավունքի գերակայության և սպառողների պաշտպանության հարցերով հանձնակատար Մայքլ ՄաքԳրաթին,

Ֆրանսիայի, Շվեյցարիայի, Գերմանիայի, Իտալիայի, Իսպանիայի, Նիդեռլանդների, Հունաստանի, Միացյալ Թագավորության և Բելգիայում գործող եվրոպական լրատվամիջոցներին ու մամուլի գործակալություններին, ինչպես նաև EUObserver-ին,

«Հայաքվեի» միջազգային գործընկեր հասարակական կազմակերպություններին և այլ միջազգային ցանցերի ներկայացուցիչներին։

Հիշեցնենք, որ Ավետիք Չալաբյանի գործով առաջին դատական նիստը նշանակված է այսօր` 2026 թվականի օգոստոսի 21-ին, ժամը` 14:00-ին։ Պաշտպանական կողմի գնահատմամբ՝ մեղադրանքը հիմնված է չստուգված և չհաստատված աղբյուրներից ստացված նյութերի վրա, իսկ ներկայացված մեղադրանքի որևէ էական հանգամանք չի հիմնավորվում պատշաճ ապացույցներով։

«Հայաքվեն» շարունակելու է միջազգային հարթակներում բարձրաձայնել քաղաքական հետապնդումների, արդար դատաքննության իրավունքի խախտումների և իրավունքի գերակայության հետ կապված խնդիրները՝ պահանջելով պատշաճ միջազգային ուշադրություն և գնահատական։