Պոլսահայ համայնքում քննարկել են հայկական վարժարաններում հայաստանցի աշակերտների կրթության արգելքի հարցը

Թուրքիայի հայկական հիմնադրամների՝ վաքըֆների միությունն օգոստոսի 24-ին խորհրդակցություն է անցկացրել երկրի կրթության նախարարության վերջին որոշման վերաբերյալ, որով Ստամբուլի հայկական վարժարաններում այսուհետ արգելվելու է հայաստանցի երեխաների կրթություն ստանալու իրավունքը։

Ինչպես հաղորդում է  Ստամբուլի հայկական «Ժամանակ» օրաթերթը, խորհրդակցությանը մասնակցել են Պոլսո Հայոց պատրիարք Սահակ արքեպիսկոպոս Մաշալյանը, Թուրքիայի իշխող «Արդարություն և զարգացում» կուսակցությունից ընտրված հայազգի պատգամավոր Սևան Սըվաջըօղլուն, վաքըֆների միության և Սուրբ Փրկիչ Ազգային հիվանդանոցի ատենապետ Պետրոս Շիրինօղլուն, հայկական վարժարանների տնօրեններ և ներկայացուցիչներ։

Շուրջ տասը տարի հայաստանցի երեխաներին, ում ծնողները Թուրքիայում ունեն աշխատանքի կամ բնակության իրավունք, թուրքական իշխանությունները «հյուր-աշակերտի» կարգավիճակով թույլատրում էին կրթություն ստանալ Ստամբուլի հայկական դպրոցներում։ Այստեղ երեխաները, թուրքահայ երեխաների հետ կողք կողքի, մասնակցում էին բոլոր դասընթացներին, հանձնում էին քննություններ, սակայն պաշտոնական ավարտական վկայական չէին ստանում։ Փոխարենը, նրանց էր հանձնվում ավարտական գնահատականները պարունակող փաստաթուղթ։

Սակայն Թուրքիայի կրթության նախարարության տեսուչները օրերս տեղեկացրել են հայկական դպրոցներին, որ նրանց հարկի տակ հայաստանցի երեխաներն այլևս չեն կարող շարունակել ուսումը։ Փոխարենը, նոր որոշման համաձայն՝ այդ երեխաները պետք է կրթություն ստանան թուրքական պետական դպրոցներում։

Սըվաջըօղլուն և Շիրինօղլուն օգոստոսի 24-ին տեղի ունեցած հանդիպման ժամանակ հայտնել են, որ ներկայիս իրադրությունն առաջացել է մի շարք թյուրիմացությունների հետևանքով։ Մասնավորապես նշվել է, որ տարբեր անգամներ համայնքի տարբեր պատասխանատուների կողմից «հյուր-աշակերտների» թվի վերաբերյալ ներկայացվել են տարբեր, իրար հակասող տվյալներ։ «Ժողովի ընթացքում նշվել է, որ սա այդքան էլ խնդրահարույց ու բարդ գործընթաց չէ, և լավատեսություն կա խնդրի լուծման ուղղությամբ»,- փոխանցում է «Ժամանակ» օրաթերթը։

Հանդիպմանը Սըվաջըօղլուն հայտնել է նաև, որ Թուրքիայի հայկական վարժարանների ներկայացուցիչները սեպտեմբերի 28-ին կհանդիպեն Ստամբուլի նահանգապետ Դավութ Գյուլի հետ։ Հանդիպման օրակարգում է լինելու համայնքային վարժարանների շենքերի՝ երկրաշարժերի դեմ ամրակայման և դիմադրունակության բարձրացման խնդիրը։

«Համայնքային շրջանակները երկար ժամանակ է, ինչ մտահոգ են Թուրքիայի հայկական վարժարանների շենքերի ամրության հարցով։ Մասնագիտական տեղեկագրերը ցույց են տալիս, որ դրանց վիճակն այդքան էլ լավ չէ։ Ուստի ակնկալվում է պետության աջակցությունն այդ շենքերի ամրացման հարցում»,- գրում է օրաթերթը։