Սերգեյ Փարաջանովն այսօր կդառնար 98 տարեկան

Հայ ու համաշխարհային կինոյի պատմության մեջ իր մեծ ավանդն ունեցած, պոետիկ կինոյի ամենավառ ներկայացուցիչներից մեկը՝ կինոռեժիսոր, սցենարիստ, գեղանկարիչ Սերգեյ Փարաջանովն այսօր կդառնար 98 տարեկան:

Իր գլուխգործոց ֆիլմերով, Փարաջանովը մի ամբողջ դարաշրջան ձևավորել է խորհրդային և համաշխարհային կինոյում: Նրա բացառիկ, ինքնատիպ ու հզոր կինոգեղագիտությունը սերում էր գեղեցիկի մշտական պաշտամունքից, աշխարհի պոետիկ ու անսովոր ընկալումից ու անսահման ազատությունից:

1964թ. նկարահանված «Մոռացված նախնիների ստվերները» ֆիլմով սկսվել է Փարաջանովի մեծ վերելքի ճանապարհը, որի ընթացքում նկարահանվել են համաշխարհային փառքի արժանացած մի շարք ֆիլմեր, այդ թվում «Սայաթ Նովա» կամ «Նռան գույնը» (1969), «Լեգենդ Սուրամի ամրոցի մասին» (1985), «Աշուղ Ղարիբ» (1988):

Հայաստանի ազգային կինոկենտրոնը մեծ ջանքեր է գործադրում կինոռեժիսորի հայ ու համաշխարհային նշանակության ժառանգության պահպանման գործում: Ս. Փարաջանովի «Տրիպտիխ»-ը ընդգրկվել է Ֆրանսիայի Պոմպիդու կենտրոնի ժամանակակից արվեստի ազգային թանգարանի հավաքածուում: Փարաջանովի «Հակոբ Հովնաթանյան»-ը (1967թ.) առաջին հայկական ֆիլմն է, որն ընդգրկվել է թանգարանի հավաքածուում:

«Ես հայ եմ, ապրում եմ Թիֆլիսում, մեղադրվում եմ ուկրաինական նացիոնալիզմի մեջ: Ուր էլ, որ լինեմ, լավ ֆիլմեր եմ նկարում, եթե անգամ ինձ Աֆրիկա ուղարկեք, կնկարեմ աֆրիկյան լավ ֆիլմեր»,- ասում էր Ս. Փարաջանովը: